Allen, die disen brief lesent oder ho^erent lesen, kúnden wir Amor von Luterberg¹ ritter vnd Jacob sin elicher sun vnd veriehint || offenlich an disem brief, daz wir mit gesundem libe mit gůter beschaidenhait vnd mit wolbedahtem sinne dise nach gescriben lúte || Cůnraten vnd Walthern Weldelin gebrůder, Adelhaidun dez selben Cůnratz Veldelins elichun wirtenne vnd Cu^enin sinen elichen sun, || dú a^elllú vierú v´nser aigen warent, reht vnd redelich habint verkoffet vnd ze koffen geben dem êrwirdigen v´nserm gena^edigen herren abt Herman dez gotzhuses ze sant Gallen² an dez selben gotzhus stat vnd ze dez selben gotzhus handen vmb daz ligend gůt halbes, daz Cůnrat vnd Walther die vorgescriben Veldelin gebrůder von iro vatter ald můter ge erbet hant, ez sie aigen ald lehen, daz selbe ligent gůt halbes v´ns die vorgenanden Veldelin gebrůder reht vnd redelich geben vnd geuerteget hant, als v´ns benůgt vnd vor geriht ertailet wart, vnd habint och wir Amor von Luterberg ritter vnd Jacob sin elicher sun die vorgescriben lúte ledeklich vf gen vnd gebint sú och vf mit disem brief an dez vorgenanden v´nsers gena^edigen herren abt Hermans dez gotzhus ze sant Gallen hand an dez vorgescriben gotzhus stat. Wir habint och gelobt, der selbun lút vnd koffes wer ze sin nach reht, wa sin daz vorgescriben gotzhus ald an herre dez selben gotzhus bedurfent ald notdúrftig sint vf gaistelichem ald weltelichem geriht, vnd entzihent v´ns mit disem brief aller der reht vorderung vnd ansprache, so wir ald v´nser erben ald nachkomen ie an denan vnd zů denan vorgescribenen lúten hettunt ald gewnnent ald wir hie nach dar zů immer han ald gewinnen mugint ald mo^ehtint vf gaistelichem ald vf weltelichem geriht ald ân reht dehainen weg. Vnd ze merer sicherhait aller vorgescribener ding, daz du sta^et vnd vnwandelba^er sient vnd belibent nu vnd hie nach, so henken wir Amor von Luterberg ritter vnd Jacob sin elicher sun v´nserú insigel an disen brief. Dis geschach vnd wart dirre brief gen ze Wil³ in der stat, an dem na^ehsten ma^entag vor v´nser vrown tag ze der liehtmisse, do man zalte von gottes gebúrt drútzehenhundert jar, dar nach in dem ahtoden vnd vierzigosten jare.

Source Fulltext: Chartularium Sangallense VII, Nr. 4068, S. 3-4.