Wir Herman von gottes vnd des stůls gnâden ze Rôme besta^eter abt des gotzhus ze sant Gallen¹ vnd gemainlich der conuent des selben gotzhus von sant Gallen in Costentzer bistům tu^egint || kunt vnd veriehent offenlich an disem brief allen, die in sehent, lesen alder ho^erent lesen, das wir mit gůter vorbetrahtung vnd mit gemainem rât v´nsers capitels von v´nsers vorgenanten gotzhus || grosser redlicher not wegen vnd durch meren v´nsers gotzhus schaden ze wenden den kilchunsatz der kilchun ze Sumbri² vnd die widum gelegen ze Sumbri, da der selb kilchunsatz in || ho^eret, dú v´nser aigen wârent, reht vnd redlich habint verko^vffet vnd ze ko^vffen geben fúr aigen mit allen rehten, nútzen vnd gewonhaiten, so zů dem selben kilchensatz vnd der widem geho^erent alder darin von reht oder gewonhait geho^erent, vnd as^a) wir vnd v´nser fordern von v´nsers gotzhus wegen den obgenanten kilchensatz vnd die widem vntz her braht habint, v´nserm lieben o^ehain grafen Friderich von Tockenburg³ vnd sinen erben vmb hundert mark silbers gůtes vnd vnuersprochenes Costentzer gewihtes, des selben silbers er v´ns a^elleklich vnd gar gewert hât, das selb silber wir in v´nsers vorgedahten gotzhus schinberen vnd redlichen nutz bewendet habint vnd bekert, vnd habint v´nserm o^ehan graf Friderich von Tockenburg den vorgenanten kilchensatz vnd widem ze Sumbri ledclich vf geben vnd von v´ns vnd von v´nserm capittel geuertigot an sin hande vnd siner erben mit worten, mit werken, mit ra^eten, mit gehúgde, mit allen den dingen, so darzů hortond, nútz gůt oder notdurftig wârent von gewonhait alder von reht v´nsers vorgenemten gotzhus vnd capitels. Wir habint o^vch gelobt mit v´nseren trúwen fúr v´ns vnd alle v´nser nachkomen, des vorgeschribenn ko^vffes kilchensatz vnd widem wer ze sinne, wâ sin der vorgenant graf Friderich von Tockenburg v´nser o^ehan oder sin erben bedurfent ald notdurftig sint, nu ald hie nach. Vnd entzihent v´ns mit disem brief aller der reht, vorderung, ansprâch vnd aigenschaft, so wir oder v´nser nachkomen oder v´nser gotzhus an den vorgeschriben kilchensatz vnd widem ze Sumbri ie hettond oder gewinnent oder wir hie nach darzů oder daran an dehainen tail iemer han alder gewinnen mugint oder mo^ehtint in dehainen weg mit geriht oder ân geriht. Wa^eri o^vch, das wir ald v´nser nachkomen ietz dehain brief inne hettint oder hie nach iemer fundent vmb den vorgeschriben kilchensatz oder vmb die vorgenanten widem, die dem vorgenanten grâf Friderichen von Tockenburg v´nserm o^ehan oder sinen erben scha^edlich gesin mo^ehtint, oder wie der vorgenant kilchensatz vnd dú widem in v´nsers vorgenanten gotzhus gewalt komen sint, die selben brief sond v´ns noch kainen v´nsern nachkomen enkain nútz noch gůt sin in der vorgeschriben sach wider den vorgenanten grâf Friderich von Tockenburg noch wider sin erben nu noch hie nach vf gaistlichem noch vf weltlichem geriht noch âne reht noch in kaines wegs. Wir entzihent v´ns o^vch in der vorgeschriben sache aller der frihait, reht, brief, schirmes vnd gewonhait, so wir alder v´nser nachkomen habint oder noch gewinnen oder erwerben mo^ehtint von . . ba^ebsten oder von denen, die vnder den sint, oder von byschoffen oder von den, die vnder den sint, oder von v´nsers ordens wegen oder von kaysern oder von . . kúngen oder an lantgerihten oder an weltlichen gerihten, da mit wir v´ns ald v´nser gotzhus ald ieman von v´nseren ald v´nsers gotzhus wegen in der vorgeschribenen sach wider den obgenanten grâf Friderich von Tockenburg ald wider sin erben iemer geschirmen oder geweren mugint oder mo^ehtint, das inan an der obgeschribenen widem vnd kilchensatz scha^edlich sie ald sin mug nu ald hie nach. Vnd ze ainer meren^b) sicherhait aller vorgeschribener sache so gebin wir dem vorgenanten grâf Friderich von Tockenburg v´nserm o^ehan vnd sinen erben disen brief besigelten mit v´nsern abt Hermans vnd des capittels insigeln des vorbenemten gotzhus ze sant Gallen. Dis beschach vnd ward dirre brief geben ze sant Gallen in der stat in dem jâr, do man zalt von gottes gebúrt drúzehenhundert jâr, vierzig jâr vnd darnach in dem núnden jâr, an dem na^ehsten fritag nach v´nser frowen tag ze der liehtmisse.

Source Fulltext: Chartularium Sangallense VII, Nr. 4108, S. 38-39.