Allen den, die disen brief sehent lesent oder ho^erent lesen, kúnden wir Je^acli vnd Cu^eni die Hůter, Hainrichs des Hůters selgen sún burger ze sant Gallen, || vnd veriehent des offenlich an disem brieue, das wir mit gůter vorbetrahtunge vnd mit bedahtem můt redlich vnd reht verko^vft vnd ze ko^vffen geben || habent dem spital vnd des spitales maister ze sant Gallen¹ allú dú reht, dú wir hatten vnd dú wir vntz her gehept vnd genossen haben an dem || hof ze Lúchingen² gelegen, des selben houes aigenschaft des vorgeschriben spitales ist, vmb ains vnd vierzig phunt phenning gůter vnd ga^eber Costentzer múnse, der wir gantzlich vnd gar darumb gewert sient vnd emphangen habent vnd an vnsern offen nutz bekeret, vnd darumb so enzihen wir vns vnd habent enzigen fúr vns vnd fúr vnser erben aller der reht vnd ansprach, so wir hatten ald haben mohten von dehainen sachen zů dem^a) vorgeschriben houe, also das wir noch dekain vnser erben zů dem vorgeschriben houe noch zů dem vorgenemten spital von des vorgenemten houes wegen niemer me dekain reht noch kain ansprach haben noch gewinnen sont mit gaistlichem noch mit weltlichem gericht noch ân gericht. Wir habent o^vch gelopt mit gůten trúwen, das wir vnd vnser erben reht wern súllent sin des vorgenemten spitales vmb den vorgeschriben ko^vff nach reht gen menlichem an gaistlichem vnd an weltlichem gericht. Vnd ze ainer gantzer warhait vnd sta^eter sicherhait der vorgeschriben sache so henken wir vnserú insigel an disen brief. Der geben wart ze sant Gallen, an dem donstag ze mittem abrellen, in dem jar, do man zalt von gottes gebúrt drúzehen hundert jar, vierzig jar vnd darnach in dem núnden jar.

Source Fulltext: Chartularium Sangallense VII, Nr. 4118, S. 48.