Ich graff Johans von Habspurg¹ tůnd kunt allen den, die disen brieff sehent oder ho^errent lesen, das fúr mich kam an offen gericht Berchtold von Wittikon², den man nempt Ka^vl, burger ze Rappreswil³, vnd mit bedachtem můt gesundem lib vnd gůter bescheidenheit do vertgot er vnd gab uff mit miner hand willen vnd gunst dien geistlichen herren dem abt vnd dem conuent des gotzhus ze Rúti⁴ des ordens von Premonstrey einen mút kernen ewigs geltz fúr ledig fry eigen uff dem gůt lit in der March⁵ by der alten Rappreschwile⁶ vnd heisset die Hoffstatt vnd stosset obrenthalb an Heinrichs gůt von Elsu^esse, niderthalben an Heinrichs Vischmunds gůt vnd gen des pfrůnders hus v´ber die strasß. Vnd entzech sich aller ansprach vordrung vnd rechtes, so er oder sin erben zů dem vorgenanten gůt hatten oder haben mochten vor geistlichen oder weltlichen gerichten. Es ist ouch sunderlich berett vnd bedinget, wer das vorgenant gůt innhat oder buwet, der ist gebunden vnd sol geben jerlich vff sant Martis tag an allen fúrzug einen mút kernen geltz gůtes vnd gebes Rappreschwiler mesß den vorgenanten herren von Rúti an allen schaden der selben herren, won inen der selb mút kernen jerlich werden sol vnd gefallen ist vor menglichem ab allen nútzen vnd rechten, so von dem vorgenanten gůt kunt oder dar zů geho^ert. Der vorgenant Berchtolt hat ouch gelopt fúr sich vnd sin erben, des vorgenanten mút kernen geltz wer ze sin fúr ledig fryes eigen an allen stetten a^vn geuerd, da es den vorgenanten herren von Rúti notdurftig sin mag. Vnd won dis alles beschechen ist mit miner hand, als vrtel vnd recht gab, mit aller der sicherheyt ehaffti worten vnd werken, so darzů notdurftig sin mocht, das es billich krafft vnd handvesti nu vnd hienach haben sol, so han ich graff Johans von Hapspurg ze vestem vrk(únd) alles, so hie vorg(eschriben) ist, disen brieff off(enlich) besigelt mit minem insigel. Der geben ist an samstag vor Bartholomei anno domini M°CCC°XLIX°.

Source Fulltext: Chartularium Sangallense VII, Nr. 4135, S. 62-63.