Allen, die disen brief sehent oder ho^erent lesen, kúnden wir der schulthais der rat vnd die burgerre gemainlich der statt ze Winterthur¹ || vnd vergehent offenlich mit disem brief, daz wir mit gemainem rate ainhelleklich mit dem erwirdigen herren abt Herman des || gotshus ze sante Gallen² sant Benedicten ordens gúlegen in Costentzer bystůme lieplich vnd gu^etlich v´berain komen sijen, also daz wir in vnd || sin gotshus ze sante Gallen ze burger emphangen vnd burgrecht in v´nserre statt geben hant, die wil er lebt, mit den gedingen, swaz er anstander kryeg oder sto^ezze hat, die geoffenbert vnd vfgelo^vffen sint vor dem zil, e wir in ze burger na^emmen, daz er v´ns dar vmb nicht zemanenne haben^a) sol vnd im dar zů nicht beholfen sijen, won als verre wir es gern tůnt. Swas o^vch v´ns vor dem zil solicher krieg vnd sto^esse angeuallen sint, da mit sol er o^vch nicht zeschaffenne han, er tů es denne gerne. Waz in aber hinnanhin sto^ezze oder krieg angiengi oder im bescha^ehe, da hat er v´ns vmb zemanenne, vnd so^ellent im vnuerzogenlich dar inne beholfen sin ane geuerde. Swas o^vch v´ns krieg oder sto^ezze hinnanhin angienge oder v´ns bescha^ehe, dar vmb habent wir in o^vch zemanenne, vnd sol v´ns dar inne beholfen sin vnd in sin vestinan lazzen, also ob es ze schulden kunt, daz wir im die selben vestinan, da wir in koment, helfen súlnt versorgen, als v´nser ere vnd sin nutz sije, ane alle geuerde. Were o^vch, daz sich der vorgenante v´nser herre zů iemanne verbunde, es weren herren oder stette, vnd sich fůgti, daz wir mit dien selben sinen aitgnossen zeschaffenne gewunnen von sto^ezze oder von krieg wegen, so sol er v´ns gen in vsse lassen, vnd súlnt in gen dien selben sinen aitgnossen zemanenne haben, vnd sol o^vch v´ns gen dien beholfen sin, als ob sú sin aitgenosse nicht weren, ane alle geuerde. Were o^vch, daz er iemans diener wurde, was in von des diensts wegen verlust oder sto^ezze angat, da mit hant wir o^vch nicht zeschaffenne, won als verre wir gern tůnt. Er hat o^vch gen v´ns vsgenomen v´nsern herren den Ro^emschen kúng, daz er dem gehorsam sin sol vnd im daz an sinem ait noch gen v´nserm burgrecht nicht schaden sol. Wir habent o^vch gen im vsgenomen v´nser gnedigen herren die hertzogen von O^esterrich, daz wir dien gehorsam sin wellent vnd v´ns daz gen dem vorgenanten v´nserm herren dem abte von des burgrechten wegen dekain schad sin sol, ane alle geuerde. Wir habent im o^vch dú erwirdi getan gesetzet vnd verschriben, daz in weder geste noch burgerre noch nieman fúr v´nser gerichte ladan noch fúr gebietten sol vnd er da niemanne ze rechte stan sol, won als verre er gern tůt, ane alle geuerde. Wir vergehen o^vch, daz der vorgenante v´nser herre der abt in v´nsern rat ze der statt wegen gelait hat hundert guldin gůter Florener mit voller gewicht von des burgrechten wegen, vnd hat o^vch gesworn ainen glerten ait an den hailigen, zehen iar dú na^echsten, dú nach ainander koment, v´nser burger ze sinne. Were o^vch, daz er daz selbe gůt an ain aigen in v´nserre statt leggen wolti, wenne er v´ns denne ermant, so súlnt wir im daz selbe gůt richten nach der manunge in den na^echsten drin manaden. Wenne sich o^vch daz vorgenante zil ergangen hat vnd er daz burgrecht nicht mer bi v´ns haben wil, so so^ellent wir im aber daz vorgnante gůt, ob er es e nicht an ain aigen gelait hat, im oder sinen nachkomen, ob er nicht were, richten vnd gelten in den nechsten drin manaden nach der manunge, vnd sol o^vch denne daz burgrecht ab sin ane alle geuerde. Vnd des ze ainem offennen vrkúnde der warhait dirre sache haben wir disen brief versigelt mit v´nsers rates insigel ze Winterthur. Der brief wart geben ze Winterthur an dem nechsten samstag nach sant Gerdrut tag, do man zalte von gottes geburdt drúzehenhundert jar, dar nach in dem fúnfzigesten jare.

Source Fulltext: Chartularium Sangallense VII, Nr. 4167, S. 90-91.