In gottes namen amen. Wir Herrn an von gottes vnd des stůls gna^vden ze Rome besta^eter abt des gotzhus ze sant Gallen¹ kúnden vnd veriehen offenlich an disem brief fúr v´ns vnd fúr alle v´nser na^vchkomen allen, die in an sehent lesent oder ho^erent lesen, das wir an sehent vnd an gesehen habent grosse vnd sta^ete trúw vnd dankna^em dienst, die v´ns vnd v´nserm gotzhus die beschaidnen lút V^olrich der Schedler, Wernhers sa^eligen des Schedlers elicher sun burger zů sant Gallen, vnd Adelhaid sin elichi wirtin willeklich tůnt vnd geta^vn hant vnd noch getůn mugent, da von lihen wir vnd geben in vnd V^olrichen ir beder sun vnd allen den kinden, die von dem vorgenanten V^olrich dem Schedler vnd Adelhaiden siner elichen wirtin vnd von dem selben V^olrichen irem sun jemer geborn werdent, tochtran vnd sún, fryes burgerrecht in v´nser stat ze sant Gallen vnd da vor, wa das ist, vnd haben in das gelihen luterlich willeklich vnd frylich mit aller fryhait mit aller gewonhait mit allen vnd vollen rechten, so dar zů notdúrftig ist vnd als es mit den selben worten beschlossen ist vnd beuangen, also das sú das selb fries burgerrecht von v´nser gabe, die wir in dar an tu^egen vnd geta^vn haben, volleklich haben sond von v´ns vnd von allen v´nsren na^vchkomen, wa sú denn sesshaft sint, in allem dem recht vnd gewonhait, als es ander lút vnd burger in v´nser stat ze sant Gallen ald da vor hand vnd als vntz her vngeuarlich behalten ist. Wir haben o^vch gelopt dem selben V^olrichen dem Schedler vnd Adelhaiden siner elichen wirtinnen vnd dem vorgenanten V^olrichen irem sune, das wir noch kain v´nser na^vchkomen sú noch ire kind, die von in jemer geborn werdent, an dem selben burgerrecht nicht irren súllent mit dekainen dingen, wir súllent sú an ir leben vnd an ir tode dar an mit allen dingen behalten. Vnd dar vmb das dis alles wa^vr sige vnd sta^et vnd vnwandelbar belibe, so henken wir v´nser insigel an disen brief. Der geben wart in der stat ze sant Gallen an der na^echsten mitwochen vor sant Vrbans tag, do man zalt von gottes gebúrt drúzehenhundert jar vnd dar na^vch in dem fúnfzigosten jare, da ze gegen warent dis ersamen lúte Johans Wildrich, Růdolf von Staina², Wetzel Vo^eli, Hainrich der Ko^echler, V^olrich Ma^vgelsperg, Johans der Kamber, Jacob der Gemúnder, Jacob Růprecht, Johans Herschi, Johans vnd Hainrich die Schedler, V^olrich V´belli, Johans Na^engeswiler, Cůnrat vnd Růdolf die Sůntag, Andres Messersmit vnd ander erber lút vil.

Source Fulltext: Chartularium Sangallense VII, Nr. 4173, S. 94.