Allen den, die disen brief an sehent lesent oder ho^erent lesen, kúnd ich Růdolf von Lindenberg schulthaiss ze Wil¹ vnd vergih offenlich an disem brief, daz fúr mich kament ze Wil in der stat fúr daz geriht, da ich || an offener strâsse ze geriht sasse, die beschaidenen lút Hans der alt vnd V^olrich von Magelsperg² geuetterren, vnd offenotunt da vnd veriahent baide, daz si vmb alle die sto^ess vnd misshelli, so sú vntz vff disen húti||gen tag, als dirre brief geben ist, mit an ander ie gehebt hant von fra^euelinan ald von vssprúchen ald von tailes wegen ald von dehainer hand anderr sach, mit an ander lieplichen v´ber ain komen vnd berihtet sient mit der || beschaidenhait, waz V^olrich von Magelsperg ald sin elichú wirtenn ald iro dienst varendes gůtes von Gampun³ ald von dem V^esenberg⁴ vntz her in genomen hent, daz sont sú han ân wider rede. Ez sont och Hans vnd V^olrich die vorgenanden von Magelsperg vmb daz gůt genant der V^esenberg mit an ander dez rehten pflegen an den stetten, da sú es billichen tůn sont vnd och ez zitlich ist. Ez sol och V^olrich von Magelsperg vnd sin erben an dem hus vnd hofstat ze Narrungampun⁵ vnd in den gu^etern, so dar zů ho^erent, ez si holtz, velde, wisan ald akker, ainen sehsten tail han vnd nemen v´ber al ân alle wider rede, den selben sehsten tail dez vorgeschribenn hofes vnd gu^eter het och V^olrich von Magelsperg Hansen sinem vorgenanden vetterren vnd sinen erbun verlihen zwelf jâre dú na^ehsten nach an ander vmb ainen ja^erklichen zins, also daz Hans der vorgenant von Magelsperg vnd sin erben V^olrichen von Magelsperg vnd dez erbun von dem vorgeschribenn sehsten tail dez obgenanden hofes vnd gu^eter ja^erklich ze zins gen sont aht schilling pfenning gůter Costenzer múns, sehs viertal kernen vnd sehs viertal habern alles gůtes Wiler messes ze den zilen, als sitte vnd gewonlich ist, Hans von Magelsperg ald sin erben buwint den hofe selb ald sú lihint in fúro. Ta^etint sú dez nit, so het V^olrich von Magelsperg ald sin erben vollen gewalt vnd fryes vrlub, sú vmb den zins ze no^etenn ald ze pfendenn. Wa^er aber, daz hagel, winde, vrlúg ald vngewa^ehste v´ber land ald v´ber den hof giengi, da von gebrest ka^emi, so sol V^olrich von Magelsperg vnd sin erben an dem vorgeschribenn zins lîben vnd lâssen, als zitlich vnd beschaidenlich ist. Ez sol och V^olrich von Magelsperg noch sin erben den obgenanden Hansen sinen vetterren noch dez erben inrunt den na^ehsten zwelf jâren an dem vorgeschribenn hof noch gu^etern holtz noch velde enkainen weg bekrenken sûmen noch ierren won vmb den vorgeschribenn zins, als vor ist geschriben. Ez sol och Hans von Magelsperg vnd sin erben daz holtz, so zů dem obgenanden hof geho^eret, niessen vnd brûchen ze siner notdurft vnd nutz, wie sú wend, dem hof vnw^estklich vnd vnscha^edelich ân geua^erde. Wa^er aber, daz V^olrich von Magelsperg ald sin erben dunhti, daz Hans sin vorgenander vetter ald sin erben daz holtz w^ostint ald fúro da mit ta^etint denn sú tůn so^eltint, daz sont sú bringen fúr Hansen den Schenken von Landegge⁶ burger ze Wil, fúr Hainrichen La^enzlin vnd fúr Hansen von Arnoltswille⁷ och burger ze Wil, ald giengi der drier ainer ab, so sont die andern zwen ainen andern erbern schidlichen man zů inen nemen, vnd waz die drie ald der mer tail vnder inen dar vmb vssprichet, dez sol baide von Magelsperg vnd iro erben genu^egen. Waz sto^esse och die selben von Magelsperg ald iro erben von dez vorgenanden hofes ald gu^eter wegen hie nach mit an ander iemer gewinnent, dez sont sú wider komen vff die drie, vnd sont nit selber dar vmb gen an ander rechen noch tůn. Wedra aber dú vorgeschribenn ding v´ber fu^er ald da wider ta^eti vnd daz die drie ald den mertail vnder inen dez dunhti, der sol von sinem rehten gar vnd gantzlich sin an dem vorgeschribenn hof vnd gu^etern ân wider rede. Vnd bâtent mich die vorgenanden von Magelsperg ernstlichen, inen hier v´ber dez gerihtes brief gen, ob ez reht wa^er, der ward inen ertailet mit gemainer vrtaild. Vnd ze merer sicherhait aller vorgeschribener ding henk ich vorgenander schulthaiss vnd rihter min insigel an disen brief. Wir Hans vnd V^olrich die vorgenanden von Magelsperg geuetterren veriehint och ainer ganzun wârhait aller der ding vnd bedingde, so Růdolf von Lindenberg schulthaiss ze Wil von v´ns an disem brief veriehen het. Vnd ze ainem wâren vrkúnd der selbun ding henkin wir v´nsrú insigel och an disen brief. Der geben ist an dem na^ehsten dunstag vor sant Niclaus tag, do von gottes gebúrt wârent drúzehenhundert jâr, dar nach in dem fúnfzigosten jâre.

Source Fulltext: Chartularium Sangallense VII, Nr. 4192, S. 108-109.