Wir Herman von gottes gnâden abt des gotzhus ze sant Gallen¹ tu^en kunt vnd veriehen offenlich an disem brief allen, die in || ansehent, lesent oder ho^erent lesen, das fúr v´ns kam V^olrich der Giel von Glatburg² vnd veriah da offenlich vor v´ns, das er das || gůt, das man nemmet der Bregestorferinen gůt, gelegen ze Gebratswille³ mit akker mit wisan mit holtz mit veld mit hof||stetten vnd mit allem dem, so von reht vnd von gewonhait darzů vnd darin geho^ert, das von v´ns vnd v´nserm gotzhus sin lehen was, reht vnd redlich verko^vft vnd ze ko^vffen geben hetti dem êrsamen manne Johansen Wildrich burger ze sant Gallen vnd sinen erben, ob er enwa^er, vmb drú pfunt pfenning gůter Costentzer múns, der er gantzlich von im gewert wa^er vnd an sinen offenberen nútz komen vnd bekert sint, vnd gab v´ns der selb V^olrich der Giel von Glatburg das vorgeschriben gůt letklich mit allen rehten vnd mit aller zůgeho^erd vf an v´nser hand vnd bat v´ns das selb gůt dem vorgenemten Johansen Wildrich lihen. Do erhorten wir sin bette vnd lúhen dem selben Johansen Wildrich vnd lihen im mit disem brieue das vorgeschriben gůt ze rehtem lêhen vnd in allem dem rehten, als es der vorgenemt V^olrich Giel bis her gehept hat, vnd enzeh sich ôch da der vorgenemt V^olrich Giel fúr sich fúr alle sin erben vnd nachkomen gen dem vorgenemten Johansen Wildrich gen allen sinen erben vnd nachkomen aller lehenschaft aller aigenschaft alles rehten aller vordrung vnd ansprach, so sú zů dem vorgeschriben gůt von reht ald von gewonhait hatten ald iemer gewinnen mo^ehtin, da mit sú das vorgeschriben gůt ald den vorgeschriben ko^vffe an gesprechen ald wider bringen mo^ehtin in dehainen weg. Der vorgenemt V^olrich Giel hat ôch gelo^vbt fúr sich fúr alle sin erben vnd nachkomen, des vorgeschriben gůtes vnd ko^vffes reht wer ze sin(ne) nach reht gen ma^englichem an gaistlichem vnd an weltlichem geriht, wa vnd wen(ne) sin der vorgenemt Johans Wildrich, sin erben vnd nachkomen bedurfent vnd notdu^vrftig sint. Vnd ist dis alles reht vnd redlich beschehen vnd vollefu^ert mit allen den worten vnd werken, so nach gewonhait vnd nach reht darzů gehorten vnd notdurftig warent. Vnd ze offenem wâren vrkúnd vnd sta^eter sicherhait aller der vorgeschriben ding, so von v´ns an disem brief geschriben stand, henken wir abt Herman da vorgenemt v´nser insigel an disen brieue. Darnach vergich ich V^olrich Giel von Glatburg da vorgenemt ain gantz warhait aller der vorgeschriben ding, so von mir an disem brief geschriben stat. Vnd ze merer sicherhait der selben ding henk ich ôch min insigel an disen brief. Der geben ist ze sant Gallen, do man zalt von gottes gebúrt drúzehenhundert jar, fúnfzig iar vnd darnach in dem ersten jare, an der kindlin tag.

Source Fulltext: Chartularium Sangallense VII, Nr. 4196, S. 111-112.