Wir graf Hans, graf Růdolf vnd graf Gotfrid von Habspurg¹ gepru^eder vergechen offenlichen mit disem brief, daz wir dez bu^ergermeisters, der raeten vnd der purger gemeinchlich der || stat Zu^erich, aller irer eydgenossen, aller irer helfer vnd diener gůt freivnt worden sein vnd sein wellen vmb vanchnuzze, vmb todsieg, vmb brant, vmb angriffe vesten oder steten, vmb all stozze || vnd missehelung vnd vmb all sachen, so vntz vf disen hiutigen tag zwischen in vnd vns vnd den vnsern vfgeloffen vnd sich vergangen hat, an all geuaerd. Wir loben auch, welheiv von vnsern || wegen geschadiget sint in der stat ze Rapreswile², in der Marck³ oder vf dem land, die hinder vns gesezzen warn oder sitzent oder sitzent werdent oder zů geho^erent, daz wir die weisen sullen vnd wellen, daz si auch gůt vreivnt sein vmb alles daz, so in beschechen ist, welher aber daz nicht tůn wolt vnd si dar vmb furbaz hassen oder veintschaft an si legen wolt, vf den vnd vf die sullen wir in mit gůten trivn geholfen vnd geraten sein, als lang vntz si ir gůt vreivnd werden an als geuaer. Wir haben auch furbaz gelobt vmb all, die leibloz getan wurden von der tat wegen, als ich egenanter graf Johans von Habspurg ze Zu^erich in die stat viel⁴, daz si dar vmb niemant vechen noch hassen sol, wer aber daz taet, vf den vnd vf die sullen wir in aber mit gůten trivn geholfen vnd geraten sein, als verr vntz si gaentzlich vmb die sache ir gůt vreivnd werden, an all geuaerd. Waer o^ech, daz iemant vnser pu^erger von Rapreswile oder vnser lau^et auz der Marck oder von Wegi⁵, wie die geheizzen sint, so den von Zu^erich wider vns vntz vf disen heivtigen tag ie gedient habent mit dhainen sachen^a), der gůt vreivnd sullen wir o^ech sein vnd dez niemer engelten lazzen mit dhainen sachen, an all geuerd. Wir sullen in o^ech ze vreivnd gewinnen all vnser vreivnd, diener vnd gesellen vnd mit namen alle die, die in von der tat wegen veint sein wolten⁶, an all gewaerd. Wir vergechen o^ech offenlich vnd tůn menlich ze wizzen, daz diseiv richtung vnd all stozze, die vntz her vf geloffen sint, vnschedlich sein sullen allen bunden vnd priefen, die wir vnd die von Zu^erich mit ein ander hatten vormals⁷, ee ich der vorgenante graf Johs. von Habspurg geuangen wurd, an all geuerd. Vnd daz diseiv richtung vnd allez, daz vor an disem brief verscriben stat, nu vnd hin nach war vnd staet belibe, daz haben wir die vorgenanten grafen von Habspurg gepru^eder all drey gesworn mit vferhaben handen gelert eyd ze den heiligen fur vns, fu^er all vnser erben vnd nachkomen, vnd da wider niemer ze tůn mit worten noch mit werchen noch mit dhainen sachen, heimlich noch offenlich, won daz wir alles daz mit gůten treivn volfuren sullen, so wir an disen brief gelopt vnd gesworn haben, an all geuerd. Vnd dez ze vrchund geben wir all drey gepru^eder von Habspurg in disen brief mit vnsern anhangden insigel behangen. Daz geschechen ist, do man zalt nach Kristus gepurd dreivzechen hundert jar, dar nach in dem zway vnd fu^emftzigisten jar, der mitwochen vor Mathey apostoli.

Source Fulltext: Chartularium Sangallense VII, Nr. 4262, S. 165.