Allen den, die disen brief an sehent lesent oder ho^erent lesen, kúnd ich Bernhart der Schenk von Landegge¹ ritter || vnd vergich offenlich an disem brief fúr mich vnd fúr min erbun, das Cůnrat der Coppe burger ze Wil², der min lehen was || von dem gotzhus ze sant Gallen, sich selber mit sinem lîb vnd mit sinem gůt reht vnd redelich von mir gekoffet het an || das obgenand gotzhus ze sant Gallen vmb vierzig guldin gůter vnd wol gewegner von Florentz³, der selbun guldin ich gar vnd gantzlich gewert bin vnd die ich in minen redlichen schinba^ern nutz han bewendet, vnd han ich Bernhart der Schenk von Landegge ritter Cůnrat den obgenanden Coppen ledklich vff gên an mines gena^edigen herren hand Hermans abt des gotzhus ze sant Gallen⁴ ze des selben gotzhus nutz vnd handen, vnd han och gelobt mit miner trúwe vnd bind och min erbun dar zů mit disem brief, das wir des vorgeschribenn koffes vnd Cůnrat des Coppen fúr lehen reht wern so^ellint sin nach reht, wa sin ain herre ald der couent des obgenanden gotzhus ald Cůntz Coppe ald sin erbun bedurfent ald notdúrftig sint, vff gaistlichem ald vff weltlichem geriht ân allen fúrzug, vnd enzihe mich vnd hab mich och enzigen mit disem brief fúr mich vnd fúr alle min erbun aller der reht, vordrung, ansprach vnd lehenschaft, so wir an Cůnzen des obgenanden Coppen lib ald gůt vntz hêr ie gehebt hant ald wir dar zů hie nach iemer han mugint ald mo^ehtint von reht ald von gewonhait ald ân reht dehainen weg. Vnd ze merer sicherhait aller vorgeschribener ding henk ich min insigel an disen brief. Dis geschach vnd ward dirre brief geben ze Wil in der stat, an dem na^ehsten ma^entag nach dem hailgen tag ze pfingsten, do von gottes gebúrt warent drúzehenhundert jar, fúnfzig jar, dar nach in dem andern jare.

Source Fulltext: Chartularium Sangallense VII, Nr. 4254, S. 158-159.