Wir graf Friderich von Toggenbúrg¹ bechennen offenlich mit disem brief, dz wir mit gůten trúwen || gelopt vnd geheizzen habenn fúr v´ns vnd vnseru kind, also dz wir gůt frúnd worden sin vnd sin súlen || der ersamen bescheiden des burgermeisters, der rêt vnd der burger gemeinlich der stat ze Zúrich || vnd aller ir helfer vnd dienner vmb graf Johansen von Habspurg² vangnuzz vnd vmb alle sache vnd handelung, wie die genant sint, die si gegen im vnd sinen brůdern vnd den iren gehandlet vnd getan habent vntz vf disen húttigen tag, vnd geheizzen o^vch vmb die vorgeschriben sach niemer nichtz ze tůn getrúwlich an alle geuerd. Vnd des ze vrchunt so han wir disen brief offenlich(en) mit v´nserm insigel besigelt vnd dar an gehenket. Der geben ist ze Vtznach³ des jares, do man zalt von gottes gebúrt drúzechen hundert jar, dar nach in dem zwei vnd funfzigostem jar, an dem samstag nach aller heiligen tag.

Source Fulltext: Chartularium Sangallense VII, Nr. 4271, S. 171-172.