Wir Hêrman von gots vnd des stůls gnâden ze Rom besta^eter abt¹ vnd das cappitel gemainlich des gotzhus ze sant Gallen tv^en kvnt vnd veryehent offenlich an disem brief fúr v´ns vnd alle v´nser nachkomen allen, die in ansehent lesent oder ho^erent lesen, das wir mit gůter vorbetrahtvng vnd beschaidenhait willeklich vnd ainmv^etklich vmb sto^ess vnd misshelli, die wir von des gemainmêrkes² wegen, daruf die burger ze sant Gallen lînwât vntz vff disen hv´ttigen tag, als dirre brief geben ist, geblaîchet hant, mit denselben burgern vnd der statt ze sant Gallen gehebt habent, komen siyent vff die êrberen ritter herr V^olrichen von A^emptz³, herr Hainrich Walther von Sultzberg⁴ vnd hêrr Hartman den Mayer von Windegge⁵ ze den minnen vnd habent och gelobt mit gůten trúwen vnd bindent v´ns mit disem brief, dieselben rihtvng sta^et ze haltent ân alle geua^erde. Wir veryehen och, das die vorgenanten herr V^olrich von A^emtz, herr Hainrich Walther vnd herr Hartman der Mayer gemainlich vnd ainhelklich vmb dis vorgeschriben sach also vsgesprochen hant, das die burger von sant Gallen von disem hv´ttigen tag hin, als dirre brief geben ist, zehen jâr die na^ehsten, dú ân vnderlâss nach ainander koment, vff demselben gemainmerke blaichen sond vnd och die blaichinen ân alle geuerde besetzen sond, so sv´ túrest mugent, vnd sond die burger och vff den selben blaichinen buwen, wes sie daruf notdurftig sind ze blaichenn, âne geua^erde, vnd was inen wirdt v´ber den buwe, des sú darúber notdurftig sind, des sont si v´ns dem vorgenanten abt Hêrman ald v´nseren nachkomen, ob wir enwa^erint, den dritten tail geben vnd sond sú zwen tail haben. Wa^er och, das die burger vff dem gemainmêrk niht blaichen wo^eltint ald inen dar vff niht fv^ogti ze blaichenn, so sol es ain gemainmêrk sin. Wenn och ainhain tůch vff der blaichi lît, so sol aber die blaiki ligen mit waid, als vntz her gewonlich gewesen ist. Wenne och dieselben zehen jar v^s sint, so so^ellent wir der vorgenant abt Herman vnd v´nser nâchkomen vnd das vorgenemt gotzhus vnd die burger vnd die statt ze sant Gallen stân in allen den rehten, als wir stv^ondent, ê das wir der vorgeschriben sache vmb die vorgenanten blaichi vff die vorgenanten herr V^olrich von A^emptz, herr Hainrich Walther von Svltzberg vnd herr Hartman den Mayer von Windegge komen wârent vnd e das dirre brief geben wurde. Vnd ze ainem wâren vrkúnde vnd sta^eter sicherhait aller der vorgeschribnen dinge vnd gedinge henken wir der vorgenant abt Herman vnd gemainlich das capitel v´nser insigel vnd v´nsers conventes insigel an disen brief. Der geben ward ze sant Gallen in der statte an sant Gregorijen tag in dem jar, do man zalt von gottes gebúrt drv´zehenhundert jar, fv´nftzig jar vnd darnach in dem dritten jare.

Source Fulltext: Chartularium Sangallense VII, Nr. 4290, S. 184-185.