Allen den, die disen brief an sehent lesent oder ho^erent lesen, kúnd ich Cůnrat der Ganper || von Aino^ed¹, der seshaft ist ze Wil², vnd vergih offenlich an disem brief, dz ich mit gůter beschai||denhait vnd vorbetrahtung vnd och von miner not wegen den aker genant Geloben holtz³ || vnd die wise genant Růshartz wise³, du baidú gelegen sint zw´schent Betwisan⁴ vnd Aino^ed vnd baidú stossent an die lantstrasse, die man gat gen Ainsidellen⁵, vnd baidú min aigen warent, reht vnd redelich han verkoffet vnd fúr aigen ze koffen geben dem beschaiden man Berhtolt Sta^ehellin von Betwisan vnd sinen erbun vmb vier pfund vnd vmb fúnfzehen schilling pfenning alles gůter Costentzer múns, der pfenning ich gar vnd gantzlich gewert bin vnd die ich in minen schinba^ern nutz han bewendet, vnd hen och gelobt mit miner trúwe vnd bind och min erben dar zů mit disem brief, dz wir des vorbenempten akers vnd der wise fúr aigen reht wern so^ellint sin nach reht ane allen fúrzug, wa sin Berhtolt Sta^ehelli von Betwisan ald sin erben bedurfent ald notdúrftig sint vff gaistelichem ald vff weltelichem geriht, vnd entzihe mich vnd han mich och entzigen fúr mich vnd fúr min erben mit disem brief aller reht forderung ansprach vnd aigenschaft, so wir an den ald zů dem vorgenanden aker ald wise ie hettunt ald gewnnent ald wir hie nach dar zů immer han ald gewinnen mugint ald mo^ehtint dehainen weg mit dem rehten ald ane reht. Vnd ze merer sicherhait aller vorgescribener ding henk ich Cůnrat der obgenand Ganper min insigel an disen brief. Der geben ist an dem dunstag in den ostran, do von gottes gebúrt warent drútzehenhundert jar, fúnfzig jar, dar nach in dem dritten jare.

Source Fulltext: Chartularium Sangallense VII, Nr. 4292, S. 185-186.