Allen den, die disen brief an sehent lesent oder ho^erent lesen, kúnden wir Hans der Borhuser burger ze Wil¹, Marga||reth sin elichú wirtenn, Margareth, Hans vnd aber Margareth sinú elichú kind vnd veriehint offenlich an disem brief, || dz wir mit gůter beschaidenhait vnd vorbetrahtung die wise genant dez Waibels wise, dú gelegen ist in Tûr owe² || zw´schent Hansen dez Wattendalers vnd Maggenower³ wise, von v´nser not wegen reht vnd redelich habint verkoffet vnd ze koffen geben denan beschaidenen vrowan der a^ebtissenn vnd dem conuent gemainlich dez klosters^a) ze Maggenowe gelegen in Costentzer bistům ze des selben closters handen fúr aigen vmb sibentzehen pfund pfenning gůter vnd gena^emer Costentzer múns, der pfenning wir alleklich vnd gar gewert sient vnd die wir in v´nsern offenba^ern nutz habint bewendet vnd bekeret, vnd habint och der vorgescribenun a^ebtissen vnd dem conuent vnd dem closter ze Maggenowe die vorgescribenun wise, dú v´nser aigen wz, willeklich reht vnd redelich vnd och ledeklich mit allen rehten nútzen vnd gewonhaiten, so dar zů ho^erent, fúr aigen vf gen vnd geuerteget, als dez landes reht sitte vnd gewonhait ist, vnd habint och gelobt mit v´nseren trúwan, der selbun wise reht wern ze sine nach reht an fúrzug, wenn ald wa sin ain a^ebtissenn ald der conuent ald dz closter ze Maggenowe bedurffent ald notdúrftig sint vff gaistelichem ald vff weltelichem geriht, vnd entzihint v´ns och mit disem brief aller vorderung ansprach rehtung aigenschaft kuntschaft vnd zúgenúst, so wir an der vnd vmb die vorgescribenun wise ie hettunt ald gewnnent ald wir ald v´nser erben hie nach dar vmb immer han ald gewinnen mugint ald mo^ehtint mit geriht ald ane reht dehainen weg, vnd sint a^ellú vorgescriben ding geschehen vnd vollefu^eret mit allen worten werchen ra^eten geba^erden vnd mit aller ehafti, so dar zů hort nútz ald gůt was von reht ald von gewonhait. Vnd ze merer sicherhait aller vorgescribener ding henk ich Hans Borhuser burger ze Wil min insigel an disen brief fúr mich vnd fúr mine obgenandun elichun wirtenn vnd fúr minú vorbenempten kind, dar zů habint wir och a^ellú mit ernst gebetten Růdolfen von Lindenberg⁴ schulthaissen ze Wil, dz er ze ainem offen waren festen vrkúnd aller vorgescribener ding sin insigel och gehenket het an disen brief. Ich Růdolf von Lindenberg schulthaisse ze Wil vergih och offenlich an disem brief, dz ich von^b) ernstelicher bette wegen Hansen dez Borhusers burgers ze Wîl vnd siner obgenandun wirtenn vnd kinde min insigel och gehenket han an disen brief ze ainem waren offen vrkúnde aller vorgescribener ding. Dis geschach vnd wart dirre brief geben an dem na^ehsten zinstag vor sant Ambrosien tag, do von gottes gebúrt warent drútzehenhundert jar, fúnfzig jar, dar nach in dem vierden jare.

Source Fulltext: Chartularium Sangallense VII, Nr. 4349, S. 232-233.