Dem allerdurlúchtigesten herren hern Karlen Ro^emischem kúnge ze allen ziten merer des || riches vnd kúnge ze Beheim minem gnedigen herren enbút ich graf Johans von Habspurg¹ || minen gehorsamen willigen dienst mit gantzen trúwen, als ich billich sol. Gnediger herre, || wan ich nach rate miner frúnden manne vnd diener durch minen meren nutz vnd notdurf verkouft vnd ze koufende geben han recht vnd redlich dem hochgebornen fúrsten hertzog Albr. ze O^esterrich² ze Styr vnd ze Kernden minem gnedigen herren die burg, die stat vnd die herschaft zů der Núwen Raprechtzswile³, die mir sunderlich von minen brůdern geuallen vnd ze teile worden ist⁴, darvmbe sende ich v´ch zů des heiligen Ro^emischen riches handen vf mit disem brief die grozzen gerichte, die zo^elle, grafschaft, wiltpenne vnd vogtyen, die ich daselbs von dem riche ze lehen harbracht vnd gehebt han, vnd bitte v´wer gnad vlizzeklich, daz ir die selben lehen in dem namen als da vor mit allen nútzen vnd rechten, die dazů geho^erent, lihent von des heiligen riches wegen dem vorgenanten minem herren dem hertzogen von O^esterrich vnd sinen erben ze rechtem lehen. Mit vrkúnd ditz brieues besigelt mit minem hangendem ingesigel. Der geben ist ze Brugg⁵ an dem nechsten zinstag nach sant Jacobs tag des heiligen zwo^elfbotten, nach gottes geburt tusent drúhundert fúnftzig jaren vnd darnach in dem vierden jare.

Source Fulltext: Chartularium Sangallense VII, Nr. 4367, S. 242.