Wir Herman von gottes gnaden abt des gotzhus ze sant Gallen¹ tůnt kvnt vnd vergehin offenlich mit disem brief, daz fúr v´ns || kam Cv^onrat von Rôta², fro Angnês von Meringen³ sin elichv´ wirtinne vnd sin brůder Hug von Rota, vnd versazt da der selbe || Cv^onrat von Rôta der selben fro Angnesen siner elichen wirtinne mit vnser hantgetât willen vnd gvnst vnd mit gůtem willen des || obgenanten Hugen von Rôta sins brůders zainem rehten redelichen gewerten pfande der Herren hof ze Nideren Ahe⁴ vnd die Ah Mv´li ze Nideren Ahe vnd mit nâmen, was si ze Nideren Ah hant, daz von v´ns vnd vnserm gotzhus ze sant Gallen lehen ist, daz hant si ir alles versetzet vmb drissek mark silbers lo^etiges Costentzer gewa^eges, der sv´ si darvff bewiset hant an ir widerlegvnge gen dem gůt, so si im zů braht hat, mit dem gedinge vnd mit der beschaidenhait, daz dv´ selb fro Angnese von Meringen dv´ selben obgenanten gu^eter mit allen nútzen vnd gewonhaiten vnd mit aller ir zů geho^erde zainem rehten redelichen gewerten pfande geru^eweclich vnd fridelich haben vnd niessen sol vnd besetzen vnd entsetzen sol vnd ir erben, ob si enwere, alle die wile dv´ selben gu^eter nit von inen erlo^est werdent mit den obgenanten drissek marken silbers, also wenne vnd weles jars die obgenanten von Rôta gebrůder vnd ir erben, ob si enwerin, dv´ obgenanten gu^eter wider lo^esen went mit dem selben silber, das sonst si tůn iêgeliches jas^a) vor sant Johans tag des Thoffers, ald weles jars si dv´ selben gu^eter widerlo^esent nach sant Johans tag des Thoffers, so sol doch der nehste nûtz der selben gu^eter der selben fro Angnesen vnd ir erben doch das selb jar beliben gar vnd ga^entzelich. Vnd ist disv´ satzvng mit v´nser hantgetat willen vnd gvnst beschehen vnd vollefu^ert mit allen den worten werken vnd geta^eten, so darzů hort vnd notdurftig was nach gewonhait vnd nach reht. Vnd des ze warem vnd offeme vrkv´nd vnd sta^eter sicherhait aller dirre vorgeschriben dinge geben wir vorbenenter abt Herman v´nser insigel an disen brief. Darnach vergehen wir vorgenanten Cv^onrat vnd Hug von Rôta gebrůder, das wir die selben satzvng mit des obgenanten v´nsers gna^edigen herren abt Hermans gůtem willen vnd gvnst vnd mit siner hant mit gůtem willen getân vnd vollefu^ert haben, als vor ist beschaiden. Vnd des zainer warhait haben wir baide v´nserv´ insigel zů des obgenanten v´nsers herren abt Hermans insigel gehenkt an disen brief. Der ist ze sant Gallen geben, do man von Cristes gebúrt zalt drv´zehenhvndert jar, darnach in dem vier vnd ffv´nfzigosten jar, an sant Lucyen abende.

Source Fulltext: Chartularium Sangallense VII, Nr. 4389, S. 252-253.