Allen den, die disen brief ansehent oder ho^erent lesen, kúnd ich Růdolf von Rosenberg¹ Eglolfs sa^eligen sun von Rosenberg vnd || vergich offenlich mit disem brief fúr mich vnd fúr alle min erben, das Wilhelm von Brachsperg² mich gantzlich vnd gar || gewert hat vnd bezalt zwainzig pfunt pfennig gůter Costentzer múns, die er mir schuldig was von Johans wegen von Lên³, || Hainzen des Kellers, Růdolfs des Zollers vnd des Altermans von der Núwen Rauenspurg⁴, darumb er mir ze búrgen geben vnd gesetzet hât hern Hainrich Walthern von Sultzberg⁵, hern Cůnrat den Schenken von Landeg⁶ vnd Cůnzen von Ramswag⁷, vnd das der selb Wilhelm von Brachsperg noch sin erben noch die selben búrgen mir noch minen erben bi dem brief, so sú mir mit ir hangenden insigeln darumbe geben hand, noch von des brieues wegen niht mer schuldig sint noch gelten sond, vnd sol o^vch der selb brief mir noch minen erben ainkain nútz mêr sin vnd den vorgenemten Wilhelm vnd sinen erben vnd och den vorgenemten búrgen vnscha^edlich. Wa^er aber, das der vorgenemt Wilhelm ald sin erben alder die vorgenemten búrgen von des vorgenemten brieues alder gúlt wegen ze dehainem schaden ka^emint, den schaden sol ich vnd min erben inen gar vnd ganzlich ablegen vnd abtůn, vnd hând darumbe gewalt, mich vnd min erben ze no^etent ze pfendent vnd an ze griffent an v´nsern lúten vnd gu^etern, wa vnd wie sú wend ald mugent, vntz das wir sú von der vorgenemten gúlt vnd von dem schaden gantzlich ledig vnd los gemachen. Vnd sol v´ns noch v´nser lút noch gu^eter hieuor noch hiewider nút schirmen^a) noch gůt sin, vnd wie sú vnd ir helfer der pfandung ze schaden koment, den schaden súln wir inen o^vch abtůn. Vnd ze ainer warhait aller diser vorgeschribenn ding henk ich Růdolf von Rosenberg da vorgenemt fúr mich vnd fúr min erben min insigel an disen brief. Der geben ist ze Wil⁸, do man zalt von gottes gebúrt drúzehenhundert jar, fúnfzig jar vnd darnach in dem fúnften jar, an dem donstag nach sant Valentinstag.

Source Fulltext: Chartularium Sangallense VII, Nr. 4396, S. 257.