Wir Herman von gottes gnaden abt des gotzhus ze sant Gallen veriehent vnd tu^en kunt offenlich mit disem brief || allen den, die in ansehent lesent oder ho^erend lesen, das fúr v´ns kam Růdolf von Haldenberg¹ mit Claren, || Adelhaitun, Agnesun, Gu^etun vnd Lutcien sinen elichen swo^estran, vnd sprach der selbe Růdolf von Haldenberg, er wo^elti || die burg ze Haldenberg vnd lút vnd gůt, was darin vnd darzů geho^ert, die selb burg lút vnd gu^eter von v´ns vnd v´nserm gotzhus sin lehen sint, dien vorgenemten sinen swo^estran allen fu^egen ordnan vnd machen gemainlich ze ainem rehten gema^echt, vnd batte v´ns ernstlich mit gůter beschaidenhait vnd wolbedachtem můt, das wir im des go^endin vnd v´nsern willen darzů gebint, das taten wir durch sin ba^et, vnd fůgt ordnat vnd macht do der vorbenemt Růdolf von Haldenberg mit v´nser hant gůten willen gunst vnd verhengt die vorgescriben burg ze Haldenberg vnd all die lút vnd ellú die gu^eter, die von reht vnd gewonhait darzů vnd darin geho^erent, wa sú gelegen sint ald wie sú gehaissen sint, sú sient benemt oder vnbenemt, mit allen rehten nútzen vnd gewonhaiten, vnd fu^egt ordnat vnd machat mit disem gegenwirtigen brief recht vnd redlich den vorgenemten Claren, Adelhaiten, Agnesun, Gůtun vnd Lutzien sinen elichen swo^estran allen gemainlich vnd vnuerschaidenlich ze ainem rehten gema^echt vnd in rehtes gema^echtes wis, vnd ist och dis gema^echt alles reht vnd redlich beschehen vnd volfu^ert mit allen den worten vnd werchen, so nach reht vnd nach gewonhait darzů gehorten vnd notdurftig warent vnd als recht sitt vnd gewonlich was. Vnd ze offenn waren vrkúnt vnd sta^etter sicherhait aller diser vorgescribener ding henken wir abt Herman da vorgenemt v´nser insigel an disen brief. Darnach vergich ich Růdolf von Haldenberg da vorbenemt ain gantz warhait aller diser vorgescribenen ding vnd das alles das war ist, das min gena^ediger herre abt Herman da vorgenemt von mir verlehen^a) hat an disem brief. Vnd ze merer sicherhait der selben ding henk ich o^vch min insigel an disen brief, der geben ist ze Wil² in der stat, do man zalt von gottes gebúrte drúzehenhundert jar, fúnfzig jar vnd darnach in dem fúnften jar, an dem na^echsten zinstag vor sant Walpurg tag ze^b) ingentem mayen.

Source Fulltext: Chartularium Sangallense VII, Nr. 4401, S. 261-262.