Wir Herman von gottes vnd des stůles gnaden ze Rôme besta^eter abt des gotzhus ze sant Gallen¹ tu^en kunt vnd veriehent offenlich mit disem brieue allen, die in ansehent || lesent oder ho^erent lesen, daz fúr vns kament in der stat ze sant Gallen, do wir offenlich ze geriht sâssent, die êrbern vnd wolbeschaiden Hainrichwalther der Giel von Glatt||burg² vnd V^olrich der Giel von Helffenberg³ sin vetter kilchherre der kilchen ze Helffentswille⁴ vnd nament ze fúrsprechen Johansen Wildrich burger ze sant Gallen, der || offenot an ir stat vnd von ir wegen offenlich vor geriht vnd sprach, daz der vorgenemt V^olrich der Giel vnd Berhtolt der Giel⁵ sin brůder, der ze den selben ziten von êhafter nôt wegen selber fúr vns niht komen mo^eht, verko^vft hettint vnd ze ko^vffenn geben hettint reht vnd redlich dem êrbern vnd wolbeschaiden V^olrich dem Hofakrer burger ze sant Gallen die lehenschaft der zehenden von den nâchgenemten ho^euen vnd gu^etern, die selben lehenschaft sú von vns vnd vnserm gotzhus ze lehen hettint, die selben zehenden den vorgenemten V^olrich den Hofakrer an gehortint vnd die er von in vntz her vff disen húttigen tag, als dirre brief ist geben, ze lehen gehept hette, vnd sint daz die zehenden ab den vnd von den ho^euen ze V^fhofen⁶, die man nemmet der . . Betteno^vwer ho^ef, gelegen bi dem Watte⁷, der zehend von des Búblers gůt ze Gebraswille⁸, der zehend von Wernhers gůt ze Gebraswille, der zehend von des Sto^eren gůt ze Gebraswille vnd die zehenden von Wiprehtz gůt vnd von Opprehtz gůt ze Gebraswille vmb fúnf pfunt phenning gůter vnd genger Costentzer múnse, der sú gantzlich vnd gar von im gewert wa^erint vnd enpfangen hettint vnd an iren gůten nutz bekêrt an den stetten, da sú iren grôssen schaden mit verkomen hettint. Vnd won der vorgenemt Berhtolt der Giel ze disen ziten fúr vns niht komen mo^eht, so hett er die selben lehenschaft der vorgeschribenen zehenden von den vorgenemten ho^euen vnd gu^etern an vnser hand vf geben vnd gesendet bi dem vorgenemten Hainrichwalther dem Giel sinem vetter. Vnd batent vns eruarn an ainer vrtail, wie sú sich der selben lehenschaft der vorgeschribenen zehenden entzihen vnd in vnser hand bringen so^eltint, daz es kraft hette vnd nv vnd o^vch hie nâch sta^et vnd vnwandelber belibe. Do frâgtent wir vorbenemter abt Herman vrtail vmb, vnd ward ertailt mit gemainer vrtail, sid der vorgenemt Berhtolt der Giel die selben lehenschaft an vnser hant v^f gesendet hette bi dem vorgenemten Hainrichwalther dem Giel sinem vetter, daz dann der selb Hainrichwalther der Giel die vorgeschribenen lehenschaft an vnser hant v^f geben so^elt an des vorgenemten Berhtoltz sines vettern stat, vnd daz der vorgenemt V^olrich der Giel ainen vogt nemen so^elt vnd sich dann mit siner vnd mit des selben sines vogtes handen der vorgeschribenen lehenschaft an vnser hant vf geben vnd entzihen so^eltint. Do nam er ze vogt den vorgenemten Hainrichwalther den Giel sinen vettern, vnd gabent da die vorgenemten Hainrichwalther der Giel an des egenemten Berhtoltz sines vettern stat vnd o^vch der vorgenemt V^olrich der Giel mit siner vnd mit des vorgenemten Hainrichwalthers des Giels sines vogtes handen die vorgeschribenen lehenschaft der zehenden von den vorgenemten ho^euen vnd gu^etern, die selben zehenden den vorgenemten V^olrich den Hofakrer an geho^erent, mit allen rehten vnd mit aller zů geho^erde gantzlich vnd gar vf an vnser hant, vnd batent vns, die selben zehenden von den vorgenemten ho^euen vnd gu^etern mit allen rehten vnd mit aller zů geho^erde lihen dem vorgenemten V^olrich dem Hofakrer, dem wir o^vch die vorgeschriben zehenden von den vorgenemten ho^euen vnd gu^etern mit allen rehten vnd mit aller zů geho^erde ze rehtem lehen gelihen habent vnd lihent mit disem brieue. Der vorgenemt V^olrich der Giel entzech sich o^vch offenlich vor vns mit dem vorgenemten Hainrichwalther dem Giel sinem vogt, vnd o^vch der selb Hainrichwalther der Giel entzêch sich o^vch besunder an des vorgenemten Berhtoltz sines vettern stat vnd von sinen wegen offenlich vor geriht alles rehten, aller vordrung vnd aller ansprâch gaistlichs vnd weltlichs gerihtes, so sú vnd ir erben, ob sú enwa^erint, an der vorgeschribenen lehenschaft der zehenden von den vorgenemten ho^euen vnd gu^etern hattent ald hie nach iemer gewinnen mo^ehtint. Vnd ist diz alles beschehen vnd vollefu^ert reht vnd redlich mit allen den worten vnd werken, so von reht ald von gewonhait darzů gehortent ald ho^eren soltent vnd nôtdurftig warent vnd als reht sitte vnd gewonlich was. Vnd ze ainem wâren vrkúnd vnd gantzer sicherhait aller der vorgeschribenen dinge vnd gedinge so haben wir abt Herman abt des gotzhus ze sant Gallen da vor genemt vnser insigel gehenkt an disen brief. Darnâch veriehent wir die vorgenemten Berhtolt der Giel von Helffenberg vnd V^olrich sin brůder kilchherre der kilchen ze Helffentswille vnd o^vch wir die vorgenemten Hainrichwalther der Giel von Glatburg ir vetter vogt vnd Johans Wildrich fúrsprech in der vorgeschribenen sache ainer gantzer wârhait aller der vorgeschribenen dinge vnd gedinge vnd daz alles daz wâr ist, daz der êrwirdig vnser gna^ediger herre von gottes gnâden abt Herman abt des gotzhus ze sant Gallen da vorgenemt von vns an disem brief veriehen hât. Vnd ze merer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen in der stat, an dem na^ehsten zinstag nâch v´nser frowen tag ze o^vgsten, in dem jar, do man zalt von gottes gebúrt drúzehenhundert jâr, fúnfzig jar vnd darnâch in dem fúnften jâr.

Source Fulltext: Chartularium Sangallense VII, Nr. 4416, S. 269-271.