Allen den, die disen brief sehent lesent oder ho^eren lesen, kúnd ich Johans Ho^epting burger ze sant Gallen vnd vergich des of||fenlich an disem brief fúr mich vnd alle min erben vnd nachkomen, daz ich mit gůter vorbetrahtung den erberen vnd || wolbeschaidenen Gerwig dem Blarer vnd Johans Wildrichen phlegern des spitales ze sant Gallen¹ ze des selben spi||tales handen reht vnd redlich ze ko^vffen han geben dú zwai gartenbett, dú gelegen sint hinder dem vorgenemten spital, dú Steffan Vo^elis selgen kind warent, mit allen rehten, so darzů geho^erent, also han ich dú selben gartenbett den egenemten spitales phleger ze ko^vffen geben mit allen rehten, so darzů geho^erent, als vor geschriben stat, vmb nún vnd zwainzig phunt phenning gůter Costentzer múns, der ich gantzlich von in gewert bin vnd emphangen han vnd an minen offen nutz bekert. Dú vorgeschriben gartenbett han ich inen geuertgot vnd in ir hant brâht, als es kraft hatt. Darúber so han ich inen gelobt mit miner trúw, daz ich vnd min erben, ob ich enwa^er, ir vnd ir nachkomen vnd des vorgeschriben spitales recht wern súllent sin vmb du vorgeschriben gartenbett nach reht gen menlichem an gaistlichem vnd an weltlichem gericht. Vnd dez ze ainem waren vrchúnd vnd gantzer sicherhait aller der vorgeschriben dinge so han ich min insigel gehenkt an disen brief fúr mich vnd fúr alle min erben. Dirre brief wart geben ze sant Gallen in der stat an dem na^ehsten donstag vor vnser frowen tag ze herbst in dem jar, do man zalt von gottes gebúrt drúzehenhundert jar, fúnfzig jar vnd dar nach in dem sehsten jar.

Source Fulltext: Chartularium Sangallense VII, Nr. 4447, S. 294.