Wir baide gebrůder Herman vnd Hans von Sultzberg¹ kúnden vnd vergehin offenlich an disem brief allen den, || die in sehent alder ho^erent lesen, das wir mit den edelen herren grauen Růdolfen von Sangans² vnd mit || sines brůder sa^eligen grauen Hartmans³ kinden vmb alle die sach vordrung vnd ansprach, so wir || vntz vf disen hútigen tag, als dirr brief geben ist, mit in gehept habint, es si von der pfantschaft wegen, die wir von inen hatten in Walgo^ewe⁴, alder von kainen andren sachen wegen, lieplich vnd gu^etlich v´ber ain komen vnd verriht sigin, also das si v´ns bi aller ansprach vnd vordrung niht mer schuldig sind dann núntzig phunt pfenning alles gůter vnd genger Costentzer múns, die v´ns der obgenant graue Růdolf von Sangans vnd sins brůders sa^eligen kind gelopt hand ze gebent vnd ze rihtend, als der brief seit, den si v´ns dar vmb geben hand. Wir vergehint o^vch offenlich fúr v´ns vnd v´nser erben, wa^eri das wir alder v´nser erben dehainrlaige brief nu alder her nah fundint vmb kainr slaht ansprach, dar vmb wir^a) sprechent vnd sih vf disen hútigen tag erloffen hat, si sigint geben von gaistlichen oder von weltlichen rihtern, das die brief den obgenanten herren vnscha^edlich sin sond, wa si geoffnot werdent. Des ze vrkúnd henkint wir obgenanten Herman vnd Hans von Sultzberg gebrůder v´nserú insigel an disen brief. Der ze Veltkilch⁵ geben ward, do man zalt von Cristes gebúrt drúzehenhundert iar, fv´nftzig iar, darnah in dem sehsten iar, an sant Walpurg tag ze inga^endem maigen.

Source Fulltext: Chartularium Sangallense VII, Nr. 4437, S. 285.