Ich Fridrich von Bussenang¹ frijer herre gese^assen in Costenzer bystům lantrichter in Turgo^vwe tůn kunt mit disem brief, || daz ich ze der Lo^vben² an dem lantag offenlich ze gerichte sass des ne^ahsten samstages vor sant Nyclaus tag, vnd kam da fúr || mich der edel frije iuncher Albrecht von Bussenang³ min vetter an siner vnd siner . . geswistergit stat, der vogt er was, ainunt vnd || der beschaiden knecht Cůnrat der Karrer ampteman vnd gewisser botte der gaistlichen fro^vwen der eptischenne vnd des conuentes gemainlich des closters ze Maggno^vwe⁴ sant Bernhartes orden gelegen in Costentzer bistům ze der selben closterfro^vwen wegen vnd an ir statt andrunt. Vnd veriach da offenlich der vorgenante iuncher Albrecht von Bussenang fúr sich vnd sinú . . geswistergit vnd ir erben, daz er recht vnd redlich vnd ane alle geuerde der eptischin^a) vnd gemainlich dem conuent des vorgenanten closters ze Maggno^vwe recht vnd redlich vnd ane alle geuerde ze ko^vffenne geben hat sin ledig aigen den wingarten gelegen ze der núwen Burg⁵, den man nemmet der Solerinen wingarte, mit allem rechten, so darzů geho^eret, stosset ainhalb an Ru^od. Vitz wingarten vnd anderhalb ze den kriesbo^vmen vnd an des vogtes wingarten, vmbe zwainzig phunt vnd vmb nún phunt phenning Costentzer múntz, der er gar vnd ganzlich von inen gewert ist, des er vor gerichte veriach, vnd batt im der vorgeant iuncher Albrecht von Bussenang ze erfarnde an ainer vrtailde, wie er dien closterfro^vwen des vorgenanten closters den vorgenanten wingarten vertigen vnd vfgeben solti, daz es nu vnd hernach kraft hette. Da fragte ich vrtailde vmbe, do wart ertaillet mit gesamnoter vrtailde, were daz er den selben wingarten da vor gerichte vfge^abe mit gelerten worten an des vorgenemten Cůnrat des Karrers hand ze der eptischin vnd zů des conuentes wegen gemainlich des closters ze Maggno^vwe, daz danne dú vertigunge billich nu vnd hernach kraft hetti. Vnd also stůnt der vorgenante iuncher Albrecht von Bussenang dar fúr gerichte an den stab an siner vnd siner geswistergit statt vnd vertigote vnd gab den vorgenanten wingarten mit aller siner rechtunge vnd zůgeho^erde ledklich vf an des obgenanten Cůnrat des Karrers hand zů der eptischin vnd ze des conuentes wegen gemainlich des vorgenanten closters ze Maggno^vwe vnd verzeh sich des selben wingarten also zů iren handen vnd alles des rechten, so er darzů hatte, recht vnd redlich mit gelerten worten, als gerichte vnd vrtailde gab, vnd verzech sich o^vch fúr sich, sinú . . geswistergit vnd ir erben aller vordrung vnd ansprach vnd aller he^alfe gaistlicher vnd we^altlicher gerichten, da mit sú die vorgnanten closterfro^vwen ze Maggno^vwe oder ir nachkomen an dem selben wingarten iemer bekrenken oder beswe^arren mo^ehtin in kaine wise ane alle guerde. Der vorgenante iuncher Albrecht von Bussenang lopte o^vch da fúr sich vnd sinú geswistergit vnd ir erben, des vorgenanten wingarten wer ze sinne fúr ledig aigen nach rechte, wo die closterfro^vwen ze Maggno^vwe oder ir nahkomen des notdúrftig sint an gaistlichen vnd an we^altlichen gerichten ane alle guerde. Vnd des alles ze ainem waren vrkúnde han ich der vorgenante lantrichter nah rechter vrtailde disen brief besigelt mit des lantgerichtes insigel in Turgo^vwe. Ich der vorgenante iuncher Albrecht von Bussenang vergihe o^vch offenlich an disem brief, daz ich allú dú ding, dú vor an disem brief von mir verschriben stant, recht vnd redlich volfu^eret vnd getan hab, vnd des ze ainem offennen vrkúnde der warhait vnd meren sicherhait dirre sach hab ich o^vch min ingesigel gehenket an disen brief. Der geben wart an dem vorgeschriben lantag nach gots gebúrte drúzehenhundert iar vnd im sechsten vnd fúnfzigesten iare.

Source Fulltext: Chartularium Sangallense VII, Nr. 4453, S. 302-303.