Allen den, die disen brieff sechent oder ho^erent lesen, kúnde ich Johanns Horner amptman vnd pfleger des wolgepornen vnd mines gnedigen heren gra^vff Fridrichs von Togkemburg¹, dz ich lutterlich durch gott vnd durch miner vnd miner vordren selen vnnd sunnderlich durch frow Briden sa^eligen miner elichen wirtinen sele hailes wyllen mit bedauchtem můtte vnd gůtter vorbetrachtunng vnd mit gůttem wyllen geordnott vnd geben han den erwirdigen gaistlichen frowen der a^eptissinen vnd dem conuent des gotzhuß ze Maggenowe² des ordens von Cytels in Costentzer bistum min wyse, die man nempt Tobelwyße³ vnd ain halb stosset an den hoffe ze Bebingen⁴ vnd andrenthalb an Hainrichsberger⁵ zelge vnd min fryes ledig aigen was vnd ja^erlich ain mutt kernen Wiler⁶ meß giltet vnd zway hu^ener, also mit dem gedinge, dz die selb wyse mit allem rechte, so dar zů geho^eret, vnd was da von komen mag, ob sy mer wurdi gelten, ledeklich dienen sol den vorgenanten frowen an den tisch, vnd sol dz ain frowe, die der pitancie vnd der diennsten oder ja^vrzytten des vorgeschribnen gotzhuses enpfliget, in nemen vnd versorgen vnd vsrichten, als sy ouch ander pytancie vnd ja^vrzytt versorget vnd vsrichtet, nach des vorgenanten gotzhuses vnd closters ze Maggenow sytten vnnd gewonhait. Hier vmb ze ainer meren sicherhait so han ich der obgenant Johanns Horner die vorgeschribnen wysen mit allem rechten fryhait vnd ehaffti, so dar zů geho^eret, der erwirdigen frowen swo^ester Katherinen von Eppenberg a^epptissin⁷ des vorgeschribnen gotzhuses ze Maggenow ze ire vnd ir conuentes vnd gotzhuses wegen frylich vnd ledeklich in ir hannd vf geben vnd loben ouch den obgenanten frowen vnnd ir nachkomen fúr mich vnd min erben vnd nachkomen, da wider niemer ze tůnde mit worten nach^a) mit wercken mit gerichte gaistlich oder weltlich nach^a) on gericht. Ich loben in ouch fúr mich vnd min erben vnd nachkomen, der obgenanten wysen mit stegen vnd mit wegen mit wasser vnd wasser rúnsen vnd mit aller rechtunng fryhait vnd eehaffti, so dar zů geho^eret, wer ze sinde fúr ain fryes lediges aigen an gaistlichem vnd an weltlichem gerichte vnd an allen stetten, wo oder wenn sy des bedurffent oder nottúrfftig sind, nach rechte, vnd han ouch diß geta^vn mit aller eehaffti worten vnd wercken, so dar zů hortte oder nottúrfftig was von rechte oder gewonhait der stetten oder des lanndes. Vnd dz diß alles wa^vr sye vnd sta^ett belibe, so gib ich der egenante Johanns Horner fúr mich vnd min erben vnd nachkomen, die ich vestenklich her zů binde, der obgenanten a^eptissin vnd dem conuent ze Maggenowe vnd ir nachkomen disen brieff mit minem hangenden insigel besigelt. Der geben ward ze Batzenhaid⁸, do man von gottes gepurt zalte M°CCC° LVII jare, darnach ze vnnser frowen tult ze der liechtmiß^b).

Source Fulltext: Chartularium Sangallense VII, Nr. 4464, S. 314-315.