Allen, die disen brief ansehent oder ho^erent lesen, kúnde ich Johans von Langenhart¹ vogt vnd wir . . der rat der stat ze Rapre||swile², daz fúr vns kame Albrecht Ga^enti burger ze Rapreswile vnd gab da ze ko^vfenne recht vnd redliche Cůnrat Lútolt o^vch burger ze || Rapreswile einen vierdenteile in einem fúnften teile des vars an Hurden³ mit aller rechtung, so dar zů geho^ert, vmb zehen gul||din gůter vnd wolgewegrer Florentiner vnd vmb fúnf schilling pfenning genger vnd geber Zúricher múns, dero der vorgenant Albrecht Ga^enti nach siner vergicht von im gar vnd gantzlich gewert ist vnd die in sinen redlichen nutze komen sint, vnd entzehe sich o^vch da vor v´ns des selben vierdenteils mit aller zůgeho^erde willeklich vnd vnbetwungellich mit siner hant an des egenanten Cůnr. Lútoltz hant. O^vch lobt er fúr sich vnd fúr sin erben, des selben vierdenteils wer ze sin nahe recht fúr recht ledig eigen âne geuerde an allen den stetten, da sin der obgenant Cůnr. Lútolt vnd sine erben notdurftig sint. Vnd do dis beschahe, do lehe do Cůnr. Lútolt dem vorgenanten Albrecht Ga^entin vnd sinen erben den vorgeschribenn vierdenteile des vars wider vmb einen zins dú nechsten drú iar, dú nu nahenander koment nahe dem tag, als dirre brief geben ist, ierlich vmb einen mutt kernen Zúricher messes ze gebenne dem selben Cůnr. Lútolt oder sinen erben, ob er enwere, ze v´nserre herren tult oder dar nahe inrunt den nechsten acht tagen ane geuerde a^ellú iar, vnd weles iars si das v´bersessint, daz si den zins nicht richtint zem vorgenanten zil, so sol der vorgeseit vierdenteile Cůnrat Lútolt vnd sinen erben ledig sin ane alle widerrede. O^vch het Cůnrat Lútolt dem obgenanten Ga^entin die gnade getan vnd sinen erben, das si den selben vierdenteile des vars wol mugent widerko^vffen in den vorgeseiten driner iaren, wenne si wende, o^vch vmb zehen guldin gůter vnd wolgeweger Florentiner vnd vmb fúnf schilling pfenning genger vnd geber Zúricher múns, vnd ist, dz der widerko^vffe beschicht vor sant Johans tag ze súngichten, so sint si des vorgeschribenn zins des iars ledig, ist aber, dz der widerko^vff beschicht nahe sant Johans tag ze súngichten, so ist dem obgenanten Cůnr. Lútolt oder sinen erben, ob er enwer, der zins des iars gantzlich geuallen mit dem ho^vptgůte, wa^er aber, dz si das v´bersessint vnd den vorgeseiten widerko^vff nit ta^eten inhalbe den vorgeschribenn drin iaren, so ist dem ebenemten Cůnrat Lútolt vnd sinen erben der vorgenante vierdenteile des vars aber gantzlich vnd gar geuallen âne alle widerrede, also das Albr. Ga^enti vnd sin erben dannenhin vordrung noch ansprach dar zů niemer me gehaben sont weder an geistlichem noch an weltlichem gerichte noch in deheinen weg. Vnd won dis so recht vnd so redlich vor v´ns beschehen ist, da von haben wir ze warem vrkúnde alles dez, so hie vorgeschriben stat, disen brief offenlich besigelt mit v´nser stat insigel dur bett beider teilen. Der geben ist an sant Michels abent, do man zalt von gottes gebúrt drútzehenhundert vnd fúnftzig iar vnd dar nahe in dem sibenden jar.

Source Fulltext: Chartularium Sangallense VII, Nr. 4500, S. 350-351.