Allen den, die disen brief an sehent lesent oder ho^errent lesen, kúnd ich Růdolf von Lindenberg schulthais ze Wil¹ vnd vergih offenlich an disem brief, das fúr mich kam || ze Wil in der stat, da ich offenlich ze geriht sass, Cůnrat Kumnusa vnd Elsabet sin elichú wirtenne vnd Hainrich vnd Jacob vnd Adelhait irú kind, vnd offenot da offenlich || vor geriht Cůnrat Kumnusa, das er reht vnd redelich ze ko^vffenne geben het minen frowen von Maggenow² vnd dem conuent gemainlich dis nachgeschriben gůt, das gelegen || ist ze Swarzenbach³, dú wisen in Langenmat⁴ vnd den aker vff Hohen Furi⁵ vnd ainen aker gelegen hinder Blasenbu^el⁶ vnd die aker in Sala⁷ vnd die aker in Hutzzenbu^el⁶ vnd die Sandaker⁵ fúr reht aygen mit allen nútzzen vnd gewonhaitten vnd mit aller zů heho^erd^a) vnd rehten, als ers genossen vnd gehan het vntz vff disen húttigen tag, als dirre brief geben ist, vmb sehs pfunt pfenning Costenzer múns, dero er gantzlich gewert wa^er, vnd bat mich Cůnrat Kumnusa^b) ze eruarn an ainer vrtail, wie er sich des vorgenanden gůtz enzih vnd zů miner vorgenanden frowen handen bra^eht, das es kraft hetti nu vnd hie nach. Do wart ertailet mit vrtail, dz er die vorgenanden wisen vnd die aker vf ga^eb vnd er grif an den stab vnd ers vf ga^eb an miner frowen hand, das beschah, als reht vnd vrtail gab vnd geuelt wart. Do das beschah, do vorderotten min frowen von Maggenow Hainrich, Jacob vnd Adelhaitten des vorgenanden Cůnratz Kumnusa elichú kind vf, das sú die vorgenanden wisen vnd die aker vf ga^ebint vnd zů iro handen bra^ehtint. Do wart ertailet, das sú die vorgenanden wisen vnd die aker vf gabint mit Cůnratz Kumnusa^b) ir vatter vnd ir rehten vogt hand vnd sú gemainlich griffent an den stab vnd sú die wisen vnd die aker vf gabint an miner frowen hand, das beschah, als vrtail gab vnd geuelt wart. Do das beschah, do vorderotten min frowen von Maggenow Elsbetun Cůnratz Kumnusa elichú wirtennen vf, das si sich des vorgenanden gůtz enzih vnd es vf ga^eb an miner frowen hand, do fragt ich vorgenander rihter vmb, was reht dar vmb wa^er, do wart ertailet, das si solti stan mit ir vogt, do fragt ich vmb, wer von reht ir vogt wa^er, do wart ertailet, das Cůnrat Kvmnusa ir elicher wirt von reht ir vogt wa^er, do das beschah, als reht vnd vrtail gab vnd geuelt wart, do vorderotten min frowen von Maggenow, dz si es vf ga^eb vnd zů miner vorgenanden frowen handen bra^eht. Do fragt ich vorgenander rihter vmb, was reht wa^er, do wart ertailet, das si es och vf ga^eb mit Cůnrat Kumnusa ir elichen wirt vnd ir rehten vogt hand vnd sú griffent an den stab vnd si es vf ga^eb an miner frowen hand, das beschah, als reht vnd vrtail gab vnd geuelt wart. Vnd enzihent v´ns allú gemainlich vnd habint v´ns och enzigen mit disem brief der vorgenanden wisen vnd der aker vnd aller der reht vnd aigenschaft vnd ansprach, so wir zů dem vorgenanden gůt ie gewunnen ald gehattond ald noch gewinnen mo^ehtint dehainen weg. Wir Cůnrat Kumnusa vnd Elsbet sin elichú wirtenne vnd Hainrich vnd Jacob vnd Adelhait irú kind vergehint och an disem brief, das wir der vorgenanden wisen vnd der aker wer sont sin nach reht fúr reht aygen fúr v´ns vnd fúr vnser erben vnd nachkomen, wa sin min frowen von Maggenow vnd der conuent gemainlich bedurfent ald sin notdúrftig sint vff gaistlichem ald vf weltlichem geriht ald vff dem land. Vnd ze merer sicherhait der vorgeschribenen ding vnd bedingde henk ich Růdolf von Lindenberg schulthais ze Wil min aygen insigel an disen brief. Der geben wart ze Wil in der stat an dem na^ehsten zinstag vor dem zwelften tag, do von gottes gebúrt warend drúzehen hundert jar, fúnfzig jar, dar nach in dem sibenden jar.

Source Fulltext: Chartularium Sangallense VII, Nr. 4460, S. 309-310.