Allen den, die disen brieff sechint oder ho^erend lesen, kúnde ich Hainrich Geuetterli schulthais ze Wintertur¹, dz ich ze Wintertur offennlich ze gerichte sasß, vnnd komen da fúr gerichte die erbern lútte brůder Cůnrat schaffner der erbern gaistlichen frowen der priolin vnnd des conuentes des closters ze To^esse² Predigers ordens gelegen in Costentzer bistumb an der selben siner frowen statt ains tails vnd die erwirdigen gaischlich frowe vro Katherina Bla^vrrerin a^epptissin des gotzhuß vnd closter ze Maggeno^vw³ an ir vnd an ir conuentes statt gemainlich des selben closters ze Maggeno^vw sant Bernhartz orden von Zitel gelegen in Costenntzer bistumb anders tails, vnnd offnontte da mit fúrsprechen der vorgenante brůder der schaffner von Tosse an siner frowen statt vnd sprach, dz die selben sin frowen die priolin vnd der conuent gemainlich des closters ze To^esse durch irenn vnd iren gotzhuß notturfft willen in irem cappitel ainhelleklich v´ber ain komen sind, durch dz sy ir closter^a) schaden vnd gúlte nider leggen vnnd abrichten mugen, also dz sy nach wiser lúte ra^vt der a^epptissine vnd dem conuent gemainlich des closters ze Maggenowir gu^etter gelegen ze Hagenbůch⁴, als sy hienach benemet sind, fúr ledig aigen ze kouffenne geben hand mit allen iren rechten vnnd zů geho^erden, vnnd sind dis die gu^etter, der kelnhof ze Hagenbůch, den der alte Wellenberg buwte, giltet ains ja^vres ze zinse acht mutte vnd zwy^b) fiertel kernen, des andern ja^vres giltet er nún mutte vnd zway fiertel kernen, des dritten ja^vres giltet er X mutte vnd II fiertel kernen vnd ja^erlichs III malter haber, XVI ß d. Zúricher múntze hu^ennr vnd ayer, der oberhoff gelegen ze Hagenbůch, den V^eli Wellenberg buwet, giltet ja^erlich ze zinse VIII mutt kernen, I malter haber, I lib. d. Zúricher múntz, hu^enr vnd ayer, die zway gu^etter gelegen ze Hagenbůch, die der mayer buwet, geltent ja^erlich ze zinse VI mut kernen, II malter haber, XIIII ß Zúricher d., hu^enr vnd ayer, vnnd dz gůt gelegen ze Hagenbůch, dz Bewang buwet, giltet ja^erlich ze zinse IIII mutt kernen, ain mutt haber, V ß d. Zúricher múntz, hu^enr vnnd ayer, vnnd ist die selb korn gúlten alles Wintertur mess, vnnd sprach ouch der obgenant brůder Cůnrat der schaffner von To^esse, dz sin frowen die priolin vnnd gemainlich der conuent des closters ze To^esse der vorgenanten a^epptissinen vnnd dem conuent gemainlich des closters ze Maggeno^vw die vorgeschribnen gu^etter fúr ledig aigen recht vnnd redlich vnd on alle geua^erd ze kouffent geben hand mit allen iren rechten fryhaiten vnnd gewonhaiten mit allen nútzen mit holtz mit veld mit o^vwen mit gestrúbchen mit wasmen mit zwyen mit wegen mit stegen mit vsgengen mit ingengen mit wasserr mit wasser rúnsen vnd mit aller ehaffti, so in kainen weg dar zů geho^eren mag, vmb CC lib. vnnd XIIII lib. vnd vmb XV ß d. alles Costentzer múntz, der^c) die closter frowen des vorgenamten closters ze To^esse von den von Maggeno^vw den closter frowen gantzlich gewert sind, des ir schaffner an ir statt offennlich verjach. Vnnd zo^egte ouch da der egenampt brůder Cůnrat der schaffner^d) von To^esse ainen besigelten brieff⁵ von der priolin des closters ze To^esse, der wiste, dz im die priolin vnd der conuente des closters ze To^esse beuolhen vnnd vollen gewalt geben hatten, an ir statt den closterfrowen ze Maggeno^vw die vorgeschribnen gu^etter ze vertigen vnd vf ze geben^e), vnd sprach ouch, dz er inen die vertigunge also gern volfu^eren wo^elte, vnd batt im erfarn an ainer vrtail, wie er inen die vorgeschriben gu^etter vf geben so^elti, da mit die closter frowen ze Maggeno^vw besorgt wa^eren vnd dz es nun vnd hernach krafft hette. Do fra^vgte ich vrtail vmb, do ward ertailt mit gesamnotter vrtail, dz^f) der selbe schaffner^g) an siner frowen statt^f), sider si in geschlossen wa^eren, der a^epptissin des vorgenamten closters ze Maggeno^vw ze ir vnd ze ir conuentes wegen gemainlich die vorgeschribnen gu^etter alle an ir hand mit gelerten worten wil vertigen vnd vf geben mo^echte, vnd als balde dz beschach, dz es danne billich nun vnnd hernach krafft hette, vnnd also, dz ouch die closterfrowen ze To^esse der selben gu^etter den closterfrowen ze Maggenow fúr ledig aigen wer sin so^eltin nach rechte, vnd also stůnd der vorgenant brůder Cůnrat der schaffner von To^esse dar fúr gerichte an den stab an siner frowen statt vnd verzech sich von der priolin vnd von des conuentes wegen gemainlich des closters ze To^esse der vorgeschribnen gu^etter aller an der vorgenanten a^epptissinen hannd von Maggeno^vw ze ir vnd ze ir conuententes^b) wegen gemainlich des closters ze Maggeno^vw rech^b) vnd redlich mit miner hand von des gerichtes wegen mit gelerten worten, als gerichte vnd vrtail gab, mit aller gewarsami mit allen geba^erden gehúgden vnd geta^eten, so nach rechte oder von gewonhait zů so^elichen sachen ho^eret vnd man tůn sol vnd da mit es nun vnd hernach krafft haben mag. Vnnd des alles ze ainem wa^vren vrkúnnde so hab ich der vorgenante schulthais, als mir vor gerichte ertailt ward, der a^epptissennen vnd gemainlich dem conuent des vorgenanten closters ze Maggeno^vw disen brieff geben besigelten mit minem insigel von des gerichtes wegen, dar zů si ouch ze beden siten ze ainer meren sicherhait dirre sach gepetten hannd den ra^vt ze Wintertur, ir insigel hengken an disen brieff, vnd verjechen o^vch wir Andres der Hoppler, Egbrecht Negelli, Niclaus Schulthais an dem Orte, Cůnrat von Salla, Walther am Ort, Ru^od. Lochli vnd Cůnrat der Muchzer der ra^vt ze Wintertur, won wir wa^vrs wússent, dz alle die vorgeschribnen ding so recht vnd so^h) redlich beschechen sind, dz wir dar vmb ze vrkúnnde vnd meren sicherhait aller dirre sach durch beder tail pette willen vnnsers ra^vtes insigel ze Wintertur haben gehengket an disen brieff. Wir die priolin vnd gemainlich der conuent des vorgenanten closters ze To^esse Prediger ordens gelegen in Costenntzer bistumb verjechen ouch offennlich an disem brieff, dz wir durch v´nnsre vnd v´nnsers gotzhuß notturfft willen nicht ze ainem ma^vl wann dicke ze dem ersten mit vnns selber in vnnserm cappitel, als sitte vnd gewonlich vonⁱ⁾ alter bi vnns gewesen ist, vnd dar nach mit v´nnsers gotzhuß schaffneren vnd pflegern vnd v´nnsre gůten frúnnde vnd wiser lúte ra^vt betrachtet haben vnd ze ra^vte worden syen, wie wir des vorgenanten v´nnsers gotzhuß grosse gúlte vnd schulde, da ta^eglichs grosser schad vff gieng von zinses vnd von gesůchtz wegen, abgerichten, vnd kamen des gemainlich v´ber ain vnnd bedunckte v´nns, dz wir mit enhainen sachen v´nnsers gotzhuß gúlte vnd schulde als vnscha^edlich verkomen vnd abgerichten mo^echten, so dz wir die vorgeschribnen gu^eter dar vmb^k) verkouffetin, vnd won v´nns die closterfrowen des vorgenanten closters ze Maggeno^vw aller maist dar vmb gaben, dar vmb so hand o^vch wir inen die vorgeschriben gu^etter alle mit allen iren nútzen vnd rechten, so dar zů geho^eren, fúr ledig aigen ze kouffenne geben vmb als vil Costentzer pfenning, als vorbeschaiden ist, der wir o^vch gar vnd ganntzlich von inen gewert syen vnd si in v´nnsernn vnd v´nnsers gotzhuß elichen vnd bewerten nutz verkert haben. Vnnd zů der vertigunge, so in v´nnser schaffner dar vmb an v´nnser statt geta^vn ha^vt, als vorbeschaiden ist, ze ainer meren sicherhait, so geben wir den closterfrowen gemainlich des closters ze Maggeno^vw an v´nnsre vnd an v´nnsers gotzhuß stat vf an ir hand frylichen vnd vnbezwungenlich die vorgeschribnen gu^etter alle sament mit allen iren rechten vnd setzen sy in der selben gu^etter nutzlich gewer vnnd geben inen gewalt vnd recht, dz si vnd ir nachkomen die selben iren gu^etter mit allen iren rechten haben vnd niessen sond vnd mugen vnd si besetzen vnd entsetzen vnd dar vss tůn alles, dz inen vnd iren nachkomen nútz vnd gůt sye, als vsser irem rechten aigen. Vnnd haben inen gelopt fúr v´nns vnnd v´nnser nachkomen, dz wir dis kouffs vnnd der vorgeschribnen gu^etter aller fúr ledig aigen ir recht wer sin so^elint nach recht, wo si des notturfftig sind an gaischlichem vnd an weltlichem gericht oder an dehainen stetten, vnd ouch den vorgeschriben kouff sta^ete ze haltenne vnnd da wider nit ze komenne noch ze tůnne mit gaischlichen noch mit weltlichen gerichten noch mit enhainen sachen, da mit si oder ir nachkomen an dem selben ko^vffe oder an den vorgesaiten gu^ettern jemer bekrencket oder beschwa^eret mo^echtin werden, vnnd verziehen v´nns ouch wússenklich fúr vnns vnd v´nnser nachkomen vnd an v´nnsers gotzhuß statt an disem brieff hilf vnnd ra^vtes gaischlicher vnd weltlicher gerichten vnd mit namen des fúrzuges, mit dem wir fúrleggen vnnd sprechen mo^echten, dz dirre ko^vff mit geua^erden beschechen wa^er oder dz wir des gůttes nit gar gewert wa^eren oder in v´nnsers gotzhuß nutz nit verkeret^a) wa^er oder dz wir an dem ko^vffe úber den halben tail, so die gu^etter ze rechte wert sin mo^echtin, betrogen wa^eren, vnd ouch denen rechten, da mit man verserten gotzhúsern ze hilf koment oder wider in ir gewer sitzet, oder dz wir diß ko^vffs bezwungen syen, vnd sunderlich dem rechten, dem man sprichet gemain verzihunng veruache nit, vnd gemainlich alles des rechten geschribens vnd vngeschribens gewonhait stetten do^erffer vnd landes rechten vnd aller der fryhait vnd aller der brieffen der ba^epsten der kayser der kúnge der bischoffen, da mit wir oder v´nnser nachkomen gen der a^epptissinen vnd dem conuent des gotzhuß ze Maggenow oder ir nachkomen wider disen ko^vff vnd sach, als vorgeschriben ist, in kaine wise jemer getůn ko^enden oder mo^echten oder jeman von v´nnser wegen. Vnnd her úber ze ainem offnen wa^vrem vrkúnnde aller dirre vorgeschribner dinge, dz die nun vnd hernach sta^ete vest vnd vnuerwanndelt beliben von v´nns v´nnserm gotzhuß vnd v´nnser nachkomen, so haben wir die priolin vnd gemainlich der conuent des closters ze To^esse v´nnsre insigel gehenngket an disen brieff. Der geben ward ze Wintertur an sant Maria Magdalena a^vbennd, do man zalt von Christus gepurt M°CCC° ja^vr L ja^vr dar nach in dem VII ja^vre.

Source Fulltext: Chartularium Sangallense VII, Nr. 4492, S. 341-344.