Allen den, die disen brief ansehent lesent oder ho^erend lesen, tůn ich Walther von Bichelse¹ kunt vnd vergich offenlich mit disem brief fúr mich vnd fúr alle min erben, das || ich von miner redlichen no^vt wegen Cůnrat den Gúttinger von Zůtzwille², Růdolf vnd Bertholt sin sún vnd Iten sin tochter, die min reht aigen waren, mit lib mit gůt vnd || mit allen rehten verko^vft hân vnd redlich vnd reht ze koffenn geben hân dem erwirdigen minem gena^edigen herren abt Herman³ sinen nahkomen vnd dem gotzhus ze sant || Gallen vmb sechs pfunt pfenning gůter Costenzer múns, der ich gantzlich vnd gar von im gewert bin vnd an minen nutz hân bekeret, vnd hân och den selben Cůnrat den Gúttinger, Růdolfen vnd Bertholten sin sún vnd Itun sin tochter mit lib vnd mit gůt vnd mit allen rehten minem vorgenemten herren abt Herman sinen nahkomen vnd dem gotzhus ze sant Gallen geuertgot vnd vfgeben, als reht sitte vnd gewonlich was, vnd hab mich darúber gen dem vorgenemten minem herren abt Herman gen sinen nahkomen vnd gen dem gotzhus ze sant Gallen enzigen vnd enzich mich mit disem brief fúr mich fúr alle min erben vnd nahkomen aller aigenschaft aller manschaft aller besatzung aller lehenschaft aller kuntschaftt aller gewer aller zúgnúst lút vnd brief alles rehten gaistlichs vnd weltlichs gerichtes aller vordrung vnd ansprach, so ich von reht oder von gewonhait zů den vorgenemten lúten zů ir lib ald zů ir gůt ald daran hatte oder von kainerlay sach iemer gewinnen oder erwerben mo^echt. Ich Walther von Bichelse da vorgenemt hab och gelobt fúr mich fúr alle min erben vnd nahkomen, der vorgeschriben lút wer ze sinne nâh reht gen ma^englichem an gaistlichem vnd an weltlichem geriht, wa oder wenn sin min vorgenemter her abt Herman sin nahkomen ir amptlút ald die vorgenemten lút bedurfent ald darumb vfgetriben ald angesprochen werdent. Vnd ze offenem waren vrkúnd vnd sta^eten sicherhait aller der ding, so an disem brief geschriben stand, henk ich min insigel fúr mich vnd fúr alle min erben, die ich hierzů bind, an disen brief. Der geben ist ze Wil⁴, do von gottes gebúrt waren drúzehenhundert jar, fúnfzig jar vnd darnâch in dem sibenden jar, an dem na^echsten ma^entag vor sant Vitz tag.

Source Fulltext: Chartularium Sangallense VII, Nr. 4483, S. 336-337.