Allen, die disen brief sehent oder ho^erent lesen, kúnde ich Eberhart von Rino^vwe¹ schulthais ze Wintertur², daz ich ze Wintertur offenlich ze gerichte sass, vnd kamen da fúr mich die erbern lúte || brůder Cůnrat schaffener der closterfro^vwen ze To^ezze³ Prediger ordens gelegen in Costenzer bistůme an der priolin vnd an des conuentes stat gemainlich des vorgeschriben closters ze || To^ezze sant Dominicus orden ainunt vnd dú gaistlich fro^vwe vro Katherina Plarrerin eptischenne des closters ze Maggeno^vwe⁴ an ir vnd an ir conuentes statt gemainlich des selben || gotshus sant Bernharts orden gelegen in Costenzer bistůme andrunt, vnd offente da der vorgenante brůder Cůnrat schaffener des closters ze To^esse an siner fro^vwen der priolin vnd an des conuentes statt gemainlich des closters ze To^ezze vnd sprach, daz die selben sin fro^vwen der eptischenne vnd gemainlich dem conuent des closters ze Maggeno^vwe recht vnd redlich vnd ane alle geuerde ze ko^vffenne geben hant fúr ledig aigen ain gůt genant dú Hůb ze Hůben⁵ bi Fro^vwenuelt⁶ gelegen, die Cůnrat von Hůben buwet, giltet ie^arlich ze zinse acht mutte kernen, drú malter habern Wiler⁷ mess, ain phunt phenning Costenzer múntze, hu^enr, aijer vnd werch, daz vorgeschriben gůt ainhalb stosset an das gůt ze Atzmanswille⁸. Der selb schaffener offente o^vch, daz sin fro^vwen des closters ze To^ezze dien closterfro^vwen des vorgenanten gotshus ze Maggno^vwe recht vnd redlich fúr ledig aigen ze ko^vffenne geben hant daz gůt gelegen ze Gerlicon⁹ genant Ku^elabaggen gůt, stosset ainhalb an Clausen Bewangs gůt, vnd alles, daz si ze Gerlicon hant, giltet ie^arlich ze zinse acht mutt kernen, zwai malter habern, drissig schilling phenning Costenzer múnze, vnd stosset o^vch dar an der fro^vwen gůt von Ve^altbach¹⁰, vnd zo^egte o^vch da vor gerichte der egenante schaffener ainen offennen brief vnd vrkúnde¹¹ von der priolin vnd von dem conuente ze To^ezze, dar an stůnt, daz sú im vollen gewalt geben hatton, dien closterfro^vwen des egenanten gotshus ze Maggno^vwe dú selben gu^etter vfzegebenne vnd ze vertigenne an ir stat, vnd swas er da mit gen in te^ate, daz sú daz nu vnd hernach ste^ate haben woltin vnd da wider niemer komen noch getůn woltin, vnd do der brief gelesen wart, do geuiel mit gesamnoter vrtail, daz der selb schaffener an siner fro^vwen stat von To^ezze dien closterfro^vwen ze Magno^vwe dú vorgeschriben gu^etter mit gelerten worten an ir hand wol vertigen vnd vfgeben mo^echte vnd o^vch daz denne billich nu vnd hernach kraft hette, mit dem daz o^vch die closterfro^vwen ze To^ezze derselben gu^etter der closterfro^vwen ze Maggno^vwe wer sin súlnt fúr ledig aigen nach rechte. Vnd also stůnt der vorgenante brůder Cůnrat der schaffener dar fúr gericht an den stab an siner fro^vwen stat von To^ezze vnd verzech sich von der selben siner fro^vwen wegen vnd an ir statt der vorgeschribenen gu^etter mit aller ir rechtunge vnd zůgeho^erde an der obgenanten eptischennen hand des closters ze Maggno^vwe ze ir vnd ze ir conuentes wegen gemainlich mit gelerten worten, als gerichte vnd vrtailde gab. Wir dú priolin vnd gemainlich der conuent des closters ze To^ezze sant Dominicus orden gelegen in Costenzer bistůme vergehen o^vch an disem brief fúr v´ns vnd v´nser nachkomen, daz wir durch v´nserre vnd durch v´nsers gotshus notdurft willen nicht ze ainem mal won dicke mit v´ns selber in v´nserm cappitel vnd nach wiser lúte rat betrachtet haben, wie wir des vorgenanten v´nsers gotshus grosse gúlte vnd schaden abgerichtin, vnd sijen des gemainlich v´berain komen, daz vns dunket, daz wir v´nsers gotshus gúlte vnd schaden in kainen weg als vnsche^adlich verkomen mo^ehtin, so daz wir dú vorgenanten gu^etter, die v´nser recht aigen waren, dar vmb angriffen vnd verko^vfftin. Vnd do wir des also v´berain kamen, do dunchte v´ns, daz v´ns die vorgenanten closterfro^vwen ze Maggno^vwe, den wir dú gu^etter vail bútten, als vil dar vmb geben woltin, daz es v´ns vnd v´nserm gotshus besser getan were denne vermitten. Vnd dar vmb so haben wir der eptischenne vnd dem conuente gemainlich des vorgenanten closters ze Maggno^vwe dú vorgenanten gu^etter fúr ledig aigen ze ko^vffenne geben vmbe hundert phunt vnd vmb drissig phunt phenning Costenzer múnz gůtter vnd gene^ammer, der wir ganzlich von inen gewert sijen vnd in v´nsern vnd v´nsers gotshus bewerten nutz komen sint vnd da mit v´nsers gotshus schaden verkomen hant. Vnd haben inen dú selben gu^etter fúr ledig aigen ze ko^vffenne geben mit allen nútzen frihaiten vnd gewonhaiten, mit holz mit ve^alde mit o^vwen mit gestrúbchen mit wasmen mit zwijen mit we^agen mit ste^agen mit vsgengen vnd ingengen mit wasserrúnsen vnd flússen mit aller der ehafti vnd rehten gesůchtes vnd vngesůchtes, so in kainen weg darzů geho^eren mag. Vnd haben o^vch dem vorgenanten v´nserm schaffener vollen gewalt geben, inen dú selben gu^etter an v´nserre statt ze vertigenne vor dem gerichte ze Wintertur, als vorbeschaiden ist, vnd wellen o^vch dú verzihunge gern nu vnd hernach ste^atte han vnd da wider niemer getůn in kain wise. Vnd darzů ze ainer meren sicherhait so geben wir in an v´nserre vnd an v´nsers gotshus statt vf an ir hand frilich vnd vnbetwungenlich dú vorgenanten gu^etter mit allen iren rehten vnd setzen sú vnd ir nachkomen der selben gu^etter in ir nutzlichen gewer, daz sú die han vnd messen sont besetzen vnd entsetzen vnd dar vs tůn alles, daz si went, alls vsser irem aigenlichen gůte, vnd haben o^vch alle gemainlich vnd ainhelleklich gelopt an v´nserre vnd an v´nsers gotshus stat mit v´nsern trúwen, disen ko^vff ste^atte ze habenne vnd des selben ko^vffs vnd der gu^etter, als vorgeschriben ist, wer zesinne fúr ledig aigen nach rechte baidú vff gaistlichen vnd vf we^altlichen gerichten, wo oder wenne si oder ir nachkomen des notdúrftig sint, vnd verzihen v´ns o^vch an v´nserre vnd an v´nsers gotshus stat hilf vnd rates gaistlicher vnd we^altlicher gerichten vnd mit namen des fúrzugs, da mit wir sprechen mo^ehtin, daz dirre ko^vff geuarlich betwungenlich oder betrogenlich beschehen were ald daz daz gůt in v´nsers gotshus nutz gar nit komen were ald daz dú gu^etter ze nahe geben weren, vnd mit namen des rehten, da mit man verserten gotshúsern zehelfe kunt, vnd gemainlich alles des rechten der stette vnd des landes, aller frihait, aller brief der be^abste der kayser der bischo^effe, da mit wir oder v´nser nachkomen wider dis sach in kain wise iemer getůn ko^enden oder mo^ehtin. Vnd des alles ze ainem waren vrkúnde hab ich der obgenante schulthais ze Wintertur durch baider tail be^atte willen vnd als mir vor gerichte ertaillet wart min ingesigel von des gerichts wegen gehenket an disen brief, darzů sú o^vch ze baiden tailn durch ain meren sicherhait gebe^atten hant den rat ze Wintertur, ir insigel henken an disen brief. Vnd vergehen o^vch wir Andres der Hoppler, Egbrecht Negelli, Niclaus der Schulthais, Cůnrat von Sala, Walther am Orte, Ru^od. Lochli vnd Cůnrat Muchzer der rat ze Wintertur, won wir fúr war wissen, daz allú dú vorgeschriben ding so recht vnd so redlich beschehen sint, daz wir dar vmb ze ainer meren sicherhait aller dirre sache durch baider tail be^atte willen v´nsers rats insigel ze Wintertur gehenkt haben an disen brief. Darzů, daz allú dú vorgeschriben ding ste^atte vnd gůt vnd vnuerwandelt ane var nu vnd hernach bliben, so haben o^vch wir dú priolin vnd gemainlich der conuent des vorgenanten closters ze To^ezze fúr v´ns vnd v´nser nahkomen ze ainem offennen vrkúnd der warhait vnd zúgnúst aller dirre sache v´nserre priolin vnd v´nsers conuentes insigel gehenket an disen brief. Der geben wart ze Wintertur an dem nehsten zinstag vor sant Lucien tag, nach Cristes geburdt drúzehenhundert iar vnd in dem sibenden vnd fúnfzigosten iare.

Source Fulltext: Chartularium Sangallense VII, Nr. 4514, S. 360-362.