Wir Karl von gotes genaden Romischer keyser zu allen zeiten merer des reichs vnd kung zu Beheim || embieten dem burgermeister, dem rate vnd den burgern gmeinlich der stat zu sant Gallen vn||sern vnd des heiligen reichs lieben getrewen vnserr huld vnd alles gut. Wann wir dem hochgeborn || Rudolfen herczogen zu O^estirreich zu Steyr vnd zu Kernten³ vnserm lieben sun vnd fursten vnser vnd des reichs lantuogtey vnd pfleg zu sant Gallen empfollen haben, so gebieten wir euch bey vnsern vnd des reichs hulden ernstlich vnd wollen, das ir dem vorgenanten vnserm sun als ewerm lantuogt vnd pfleger huldent vnd swerent vnd ym wartent vnd gehorsam sint mit allen steu^eren, nucczen vnd diensten, die vnuersaczt sint, vnd sunderlich mit raysen, geczo^egen vnd mit allen friheiten, rechten vnd guten gewonnenen, die wer^a) vnd das reich bey euch haben sullen, als lang vncz wir das widerruffen. Mit urkund dicz briues versigelt mit vnserm keyserlichen ingsigel. Der geben ist zu Nuremberg nach Cristus geburt driczenhundert jar, dornach in dem acht vnd fumfczigstem jar, am nehsten dinstag nach sant Margareten tag, vnser reiche des Romischen in dem drewczenden jar, des Behemischen in dem czweleften vnd des keysertums in dem vierden.

Source Fulltext: Chartularium Sangallense VII, Nr. 4549, S. 392-393.