Wir graue Albreht von Werdenberg der elter² veriehen vnd tu^en kunt mit disem brief allen, die in ansehent lesent oder ho^erent lesen, daz fúr v´ns kam der erber herre in gotte brůder Hain||rich der Vorster probst des gotzhus vnd des conuentz ze sant Johann gelegen in Turtal³ von des selben gotzhus wegen vnd an siner stat, vnd sprach, daz v´nser lieber getrúwer Wernher der || Keller ze Bútzenswille⁴ Elisabethen, Bertholtz vnd Gerdruten sa^eligen von Maimelsperg⁵ elichen tochter wilent Jacobs des Scherers elichi wirtinn, der selb Jacob in v´nsern hof ze Bútzenswille ge||hort, mit diensten inne hetti als die lút, die in v´nsern vorgeschriben hof ze Bútzenswille geho^erent, vnd sprach och, daz die selb Elisabeth des vorgeschriben gotzhus ze sant Johann aigen wa^er von dem lîb, vnd wo^elti och die selben Elisabethen von des vorgeschriben gotzhus wegen besetzen mit můter magen, als reht wa^er, vnd bat v´ns ernstlich von dez vorg(eschriben) gotzhus wegen, daz wir dú selben besatzung von inen vfna^emin, daz taten wir durch sin emsigen ba^et, vnd besatzt do der vorg(eschriben) brůder Hainrich von des vorg(eschriben) gotzhus wegen vnd an siner stat die selben Elisabethen mit Gerdruten der Boltinun, mit Elisabethen ir tochter, mit Walthern, mit Cůnrat vnd mit Steffann den Girgeitn, mit Ha^edinun von der Straz, mit Hainrich dem Boltun vnd mit Walthern dem Kechen, dú a^ellú des vorgeschriben gotzhus aigen sint von dem lib, der vor(geschriben) lút hat ieglichs besunder gesworn ainen gelerten ayd ze den hailigen mit vfgehepter hand, daz die vorg(eschriben) Elisabeth, ir můter, ir an vnd ir vran des vorgeschriben gotzhus ze sant Johans aigen wa^erin von dem lib vnd an daz selb gotzhus gehortin. Vnd darumb so hant wir v´ns fúr v´ns vnd fúr alle v´nser erben enzigen vnd enzihent v´ns mit disem brief alles rehten gaistlichs vnd weltlichs gerihtes aller vordrung vnd ansprach, so wir zů der ald an der vorgeschriben Elisabethen zů ir lib ald zů ir gůt hatten oder iemer gewinnen mo^ehten von reht oder von gewonhait oder von dehainen andren sachen. Vnd dez ze ainer warhait henken wir graue Albreht da vorgenemt v´nser insigel an disen brief. Geben ze Werdenberg⁶ in dem jar, do man zalt von gottes geburt drúzehenhundert jar, fúnfzig iar vnd darnach in dem achtoden jare, an dem na^ehsten ma^entag vor sant Martis tag.

Source Fulltext: Chartularium Sangallense VII, Nr. 4569, S. 415.