Wir Karl von gots gnaden Romischer keiser zu allen zeiten merer des reichs vnd kunig zu Beheim embieten . . dem burgermeister || dem rat vnd den burgern gemeinlich der stat zu Strazburg vnsern vnd des reichs lieben getrewen vnser huld vnd alles || gut. Vns ist furgelegt, daz der Giek, der von Rapoltstein² diener, vnsern vnd des reichs lieben getrewen, Prendlein, Wildrichs³ || diener, burger von sand Gallen, aus^a) ewer stat vnd dorin geuangen hab vnd im ouch fúmfhundert vnd dreu vnd zwaynzig guldin vnd ouch ein pferd genumen hab vnd in ouch doruber zu swerem grossem schadem^b) bracht hab, daz vns gar vmbillich^b) dunket, daz ir des gestattet, dorumb manen wir ewer trewe, domit ir vns vnd dem reich verbunden seit, vnd gebieten euch ouch ernstlichen vnd vesteclichen by vnsern hulden, daz ir mit dem edlen Johansen von Rapoltstein, der ewer mitburger ist, doran ernstlichen weiset, daz er den egenanten Giek dorzu vesteclichen halde, daz er die egen(ante) hab vnd schaden genzlichen wieder tu^e vnd wieder kere, vnd beweiset euch also ernstlich dorzu, daz daz geschehe, doran ir vns vnd dem reich sunderlichen dienst erzeiget, hette doruber der egenant Giek zu dem Prendlin icht zu sprechen, dorumb wolten wir im ein vnuerzogen recht widerfaren lazzen vor vns oder wo er daz billich tun solte. Geben zu Prag an sand Dionisij tag, vnser reiche in dem dreuzehenden vnd des keisertums in dem vierden jare.

Source Fulltext: Chartularium Sangallense VII, Nr. 4564, S. 412.