Wir Rud.¹ etc. tůn kunt, das wir vnsern getrewen liben Frider. von Hv´nwile² an sin selbs vnd siner lehens erben stat ze burgmann genomen haben gen Rapretzwil³, da sin vordern vnd er vormals burgmanne gewesen sint⁴, vnd daz^a) si ein burggesezze gehebt hant, daz zergangen vnd vnnútz worden ist, vnd sol der eg(enant) Frider. daz selb burggesezze wider vf richten vnd buwen, als ez vns an vnsrer burg vnd der stat daselbs aller werlichest vnd nútzest ist. Wenne ouch wir oder vnser erben in vnsern landen da oben krieg haben, so sol der eg(enant) Frider. vnd, so er nicht ist, sin lehens erben mit ir selbs liben da sitzen vnd vnser vest getrewelich helfen weren vnd behu^eten. Aber bi fridlichen ziten, so wir da dhainen krieg haben, so sullen si in demselben burggesezze haben stêteklich einen erbern knecht mit eim harnesch, ob si selb nicht da sitzen wolten. Vnd har vmb haben wir dem eg(enanten) Fridr. vnd sinen lehens erben geben ze burglehen in eins rechten werenden phandes wise ane abslag der nútze vier march geltes vf vnsrer stúre des ampts ze Glarus⁵ ie fu^er ein march fv´mf guldin, die im ein iglicher vnser amptman, wer ie ze den ziten da ist, jêrlich richten vnd geben sol, vntz daz wir oder Frider., Albr. vnd Leup. vnser prúder⁶ oder vnser erben dieselben vier march gelts von in gelo^esen mit viertzig marken silbers fúr igklich mark fv´nf guldin der gewicht von Florentz. Wenne ouch das beschicht, so sullent vns die vier mark gelts ledig sin vnd sullent si die vierzig mark anlegen vnd bewenden an ligende gu^eter gelegen vmb Rapretzwil, so si nehest mugen, die eigen oder erb sein, vnd sullen die von vns ze burglehen innehaben vnd ze^b) niezzen, als burglehens vnd landes recht ist vnd als vor geschriben stat, ane alle geuerde. Mit vrchund etc. Dat. Wienne anno domini M° CCCmo. L° nono.

Source Fulltext: Chartularium Sangallense VII, Nr. 4658, S. 482-483.