Ich Cůnr. von Wartense¹ ein edel knecht kúnde vnd verich offenlich an disem briefe fúr mich || alle min erben vnd nachkomen allen den, die in ansechent alder ho^erent lesen, dz ich durch || meren vnd besseren nûtz mins vnd minr erben v´ber ein komen bin mit dem edelen wolge||bornen geystlichen herren brůder Hugen von Werdenberg² meyster sant Joh. ordens commend. ze Bůbinkon³ vnd mit dien herren gemeinlich des huses ze Bůbinkon einer rechten genossami zwischent Hansen dem Schůchdenman, der min recht eigen ist, vnd zwischen Elsin Riserin Berschis Risers elichú tochter, dú aber des vorgenanten huses von Bůbinkon recht eigen ist vnd des vorgenanten Hansen Schůchdenmans elichú husfro^vwe. Do bin ich vnd der vorgenant geystlich herre brůder Hug von Werdenberg meyster sant Joh. ordens des einhelleklich v´ber ein komen, was kinden do von den vorgeschriben Hansen Schůchdenman vnd von Elsin Riserin siner elichen husfro^vwen jemer koment, die selben kint vnd was ander kint von dien kinden jemer kumet, die súlint alle gemein sin des vorgenanten huses von Bůbinkon vnd min vnd aller miner erben vnd nachkomen. Vnd ze einer meren Sicherheit, dz nu vnd her nach disú vorgeschrioben genossami stet vnd vest belibe, hier vmb gib ich der obgenante Cůnr. von Wartense fúr mich alle min erben vnd nachkomen dem vorgenanten geistlichen herren von dem huse ze Bůbinkon disen brief besigelt mit minem eigennen ingsigel. Der geben wart, do man zalte von gottes gebúrte drúzechen hundert jar, nún vnd fúnfzig jar, an der alten vasnacht.

Source Fulltext: Chartularium Sangallense VII, Nr. 4578, S. 422-423.