Wir Herman von gottes gnâden abt des gotzhus ze sant Gallen veriehen vnd tůn kunt mit disem brief allen, die in ansehent^a) lesent oder ho^erent lesen, das fúr v´ns kam Johans von Scho^ennenberg mit Vrsullen siner elichen husfrowen, Růdolfs des Maijers tochter von Altstetten¹, vnd sprach, das er dis nachgeschriben lút vnd gůter, die von v´ns vnd v´nser gotzhus sin lehen^b) sint, Eberharten von Kintzenow vnd sinú kind, Fa^entzen ab der Hůb sin wib vnd irú kind, sines suns wib vnd irú kind, V^olrichen den Wúnzúrlin sin wib vnd irú kind, Elisabethen die Verrinunn vnd irú kind, Johans Ma^erkis wib vnd irú kind, Conrat Mauzen sin wib vnd irú kind, Johansen ab dem Bu^el² sin wib vnd irú kind, Jacob in dem Wille sin wib vnd irú kind, Gerdruten Bo^etschis vnd irú kind, Hainrichen in dem Wille sin wib vnd irú kind, Johansen Ru^edis vnd sinú kind, Annun V^olrichs Ru^edis wib vnd irú kind, Adelhaiten Cůnratz Gůten wib vnd irú kind, Adelhaiten in der Ow vnd irú kind, Elisabethen von Enkhúsren vnd irú kind, Clausen Braitenloher sin wib vnd iru kind, Johansen Braitenloher sin wib vnd irú kind, Eberharten den Scha^erer sin wib vnd irú kind, Johans Bertholtz sin wib vnd irú kind, den hof ze Kintzenow, dú gu^eter ze Seliswille, den wingarten, den man nemmet der Alt wingart, gelegen ze Scho^enenberg vnd den hof in der Rúti vnd allú die lút, die darzů vnd darin geho^erent^c), si sigent benemt oder vnbenemp, mit allen rechten nútzen vnd gewonhaiten vnd mit allen zůgeho^erd der vorgenemten Vrsullen siner elichen husfrowen vnd iren erben versetzen wo^elt vmb hundert mark vnd vmb fúnfzig mark gůtes silbers Costentzer gewiht fúr ir hainstúr vnd widerlegung, vnd bat v´ns, das wir im des go^endin vnd v´nsren willen vnd gunst darzů ga^ebin, das taten wir vnd gonden im des durch sin emsigen ba^et, vnd versatzt do der selb Johans von Scho^ennenberg vnd versetzet mit disem gegenwrtigen brief alle die lút vnd gu^eter, so hie vor an disem brief geschriben stant, mit allen rechten nútzen vnd gewonhaiten vnd mit aller zůgeho^erd redlich vnd recht der vorgenemten^d) Vrsulen^e) siner elichen husfrowen vnd iren erben^e) vmb die vorgeschriben hundert marck vnd fúnfzig marck silbers ze ainem rehten gewerten pfand mit so^ellicher balthaidenhait^f) vnd geding, das die vorgenemten Vrsula vnd ir erben, ob si enwa^er, alle die vorgeschriben lút vnd gůter mit allen rechten, als vorgeschriben sta^vt, haben niessen besetzen vnd entsetzen sont, alle die wil der vorgenempt Johans von Scho^ennenberg oder sin erben, ob er enwa^er, die vor geschriben lút vnd gůtter von ir oder von iren erben, ob si enwa^er, vmb die vorgeschriben hundert mark vnd fúnfzig mark silbers gantzlich nút hant erlo^est, wenn och der selb Johans von Scho^ennenberg oder sin erben, ob er enwa^er, von ir oder von iren erben, ob si enwa^er, lo^esen wend, das sond si tůn vor sant Johans tag des Toffers ze sunnwendi, ald der nutz von den vorgeschriben lúten vnd gu^etren ist des selben^g) jares der vorgenemten Vrsullen vnd iren erben gantzlich gevallen, der vorgemt^h) Johans von Scho^ennenberg hat och gelopt fúr sich vnd fúr alle sin erben, der vorgeschriben lút vnd gůter vnd och des vorgeschriben pfantschatz wer ze sinne nach reht gen menglichem vf gaistlichem vnd weltlichem gerich, wa vnd wenn als wie dik sin die vorgenemt Vrsulla ir erben vnd nachkomen bedurfent vnd notdurftig sint, ân geva^erd. Vnd ist dis alles recht vnd redlich beschehen vnd volfůrt mit allen den worten vnd werken, so nach gewonhait vnd nach recht dar zů gehorten vnd notdurftig waren vnd als recht sitte vnd gewonlich was. Vnd ze offenem waren vrkúnd vnd sta^eten sicherhait aller diser vorgeschriben ding henken wir abt Herman da vorgenemt v´nser insigel an disen brief, dar nach vergich ich Johans von Scho^ennenberg da vorgenemt ain gantz warhait allerⁱ⁾ diser vorgeschriben ding vnd das alles das war ist, das min gena^ediger her abt Herman da vorgenemt von mir veriehen ha^vt an disem brief. Vnd ze merer sicherhait der selben ding henck ich och min insigel an disen brief. Der geben ist ze Wil in der stat in dem jar, do man zalt von gottes geburt drúzehenhundert jar, funfzig jar vnd darnach in dem núnden jar, an dem na^echsten samstag nach sant Gregorien tag.

Source Fulltext: Chartularium Sangallense VII, Nr. 4580, S. 424-425.