Wir Herman von gottes gnâden abt dez gotzhûs ze sant Gallen¹ tu^en kunt vnd veriehen offenlich mit disem brieue allen, die in ansehent lesent oder ho^erent lesen, daz fúr vns kament ze sant Gallen, do wir || offenlich ze geriht sâssent, v´nser lieber getrúwer Walther von Englaberg² vnd Adelhait sin elichi wirtinne, vnd offenoten offenlich vor v´ns mit fúrsprechen vnd sprâchent also, sú wo^eltint durch iro vnd || durch iro vordern sêlen nutz vnd hailes willen ab dem nachgeschribenen hûs vnd hofstat gelegen ze sant Gallen in dem Bru^ele³, daz ainhalb sto^vsset an die strâsse vnd anderthalb an Johansen dez Clammen || hûs, ab dem gelt von den nâchgenemten hofstetten, die dar zů geho^erent, Johansen dez Clammen hofstat, Elsinun Kylchherrinun hofstat, Wernlis Ru^efen hofstat, Ru^edis Helffenbergs hofstat vnd Werlis Wirtz hofstat, die alle nâch ain ander bi dem vorgeschribenen hûs gelegen sint, ab dem garten gelegen ze sant Gallen vor Spiser tor⁴ an Bilgris Spisers burgermaisters ze sant Gallen⁵ vnd an Bartholome dez Blarrers garten, vnd o^vch ab dem gelt von disen nâchgenemten hofstetten, die darzů geho^erent, ab dez . . Grêtlers hofstat vnd ab V^olrices Judas hofstat, die da bi gelegen sint, die von v´ns vnd v´nserm gotzhus iro lehen wa^erint, setzzen vnd machen ainen sto^vff wines ja^erliches geltes zů dem sto^vff, der vormâles darab gesetzt vnd gemachot wa^er vff vnser refater ze sant Gallen, vnd ain êwig nahtlieht von vnschlit fúr v´nser fro^vwen altâr in v´nserm múnster ze sant Gallen vnder dem gewelbe⁶ bi sant Nycolaus altâr, vnd sechs jârzit zů disen nâchgenemten altârn, kylchen vnd cappellan, ze frôn altâr in v´nserm múnster ze sant Gallen, ze sant Ôthmars altâr, ze sant Mychêls altâr, ze sant Saluator⁷, ze dem Hailigen Grab⁸, ze v´nser fro^vwen cappelle⁹, ze sant Peter¹⁰, ze sant Tu^etel¹¹, ze sant Johans cappelle¹², ze sant Laurencis¹³ kylchen zwain lútpriestern ietwedrem lútpriester sinú jârzit sunderbar, ze der siechen spittal¹⁴ ainem cappelan, wele dann ir cappelan ist, ze sant Fiden¹⁵ kylchen, an dem Linsibu^el¹⁶, ze sant Mangen kylchen¹⁷ vnd ze sant Lienhartz kylchen¹⁸ vnd darzů ieklichem brůder besunder in der brůder spittal ze sant Gallen¹⁹ zů ieklichem der vorgeschribenen jârzit ainen Costentzer pfenning, vnd der nachgenemten closnerran, der obren vnd der vndren clôsnerrun ze sant Georien²⁰, der vordren vnd der hindren closnerrun ze sant Jacob²¹, der closnerrun ze sant Johans kylchen¹² vnd der clôsnerrun ze sant Lienhart¹⁸ ieklicher der selben closnerran zů ieklichem der vorgeschribenen jârzit sunderbar o^vch ainen Costentzer pfenning alles ja^erliches geltes, vnd bâten v´ns eruarn an ainer vrtail, wie sú daz tůn so^eltint vnd mo^ehtint, als reht wa^er vnd als ez nv^ vnd o^vch hie nâch kraft vnd maht hett vnd haben mo^eht, daz taten wir, vnd ward ertailt mit gemainer vrtail, daz die vorgenemt Adelhait ainen vogt nemen so^elt an dem ring, wen si wo^elt, mit dez vorgenemten ir elichen wirtes willen vnd si der ze drin mâlen vsser dez gerihtes ring fu^eren so^elt vnd si fragen, ob si ez willeklich vnd gern ta^et vnd tůn wo^elt, vnd daz ez dann der vorgenemt Walther von Englaberg mit siner hant vnd Adelhait sin elichi wirtinne mit ir vnd mit dez selben ir vogtes handen vnd o^vch mit vnser hant tůn so^eltint, vnd daz daz dann also wol kraft vnd maht hetti nâch dem rehten. Do nam si mit dez vorgenemten ir elichen wirtes willen vnd gunst Johansen Sa^errin burger ze sant Gallen ze vogt, der fůrt si ze drin mâlen vsser dez gerihtes ring vnd fragot si, als ertailt was, ob si ez willeklich vnd gern ta^et vnd tůn wo^elt, der sait ze ieklichem mâl bi sinem aide, daz si spra^echi, daz si ez vnbezwungenlich ta^et vnd willeklich tůn wo^elt. Vnd satztent vnd machotent do die vorgenemten Walther von Englaberg mit siner hant vnd Adelhait sin êlichi wirtinne mit ir vnd mit dez vorgenemten Johansen Sa^erris ir vogtes handen vnd o^vch mit vnser hant gunst willen vnd verhengde reht vnd redlich ab dem vorgeschribenen irem hûs, hofstat vnd garten vnd ab dem gelt von den vorgeschribenen hofstetten, die darzů geho^erent, ainen sto^vff wines ja^erliches geltes zů dem sto^vff, der vormâls ab dem vorgeschribenen hûs vnd hofstat gesetzt vnd gemachot was, ain êwig nahtlieht von vnschlit fúr v´nser fro^vwen altâr vnder daz gewelb, sechs jârzit den nâchgenemten sechs personan Růdolfs dez Ammans sa^elgen jârzit der vorgenemten Adelhaiten vatter, Elsbethen sa^elgen ir můter, Růdolfs dez Wulliwebers sa^elgen wîlunt ir elichen wirtes, Růdolfs sa^elgen iro suns vnd o^vch der êgenemten Walthers von Englaberg vnd Adelhaiten siner elichen wirtinnen iârzit, vnd o^vch daz vorgeschriben pfenning gelt den vorgedâhten brůdern vnd clôsnerinan ze ainem rehten sta^eten ja^erlichen gelt, mit so^elicher beschaidenhait vnd in dem rehten, als hie nâchgeschriben stât an disem brieue, daz die vorgenemten Walther von Englaberg vnd Adelhait sin elichi wirtinne vnd alle ir erben vnd nâchkomen vnd alle die, wer die wa^erint, in der hant vnd gewalt daz vorgeschriben hûs hofstet vnd gart iemer koment, aller ja^erlich von disem húttigen tag hin, als dirre brief geben ist, vff die tag, als dann ie der vorgenemten Růdolfs dez Ammans, Elsbethen wîlunt siner elichen wirtinnen, Růdolfs dez Wûlliwebers vnd Růdolfs sa^elgen sines suns jârzît geuallent, der vorgedâhten priester vnd cappelan, die dann dú selben vier jârzit begant zů den vorgeschribenen altarn kylchen vnd cappellan, ieklichem priester besunder von ieklichem der selben vier jârzit fúnf pfenning gůter Costentzer múnse geben vnd rihten sont ân alle geua^erde, vnd sont o^vch darzů den sto^vff wines vff v´nser refater geben vnd rihten aller ja^erlich, der vormâles ab dem vorgeschribenen hûs vnd hofstat gesetzt vnd gemachot was. Vnd wenn vnder den vorgenemten Walther von Englaberg vnd Adelhaiten siner elichen wirtinnen aines abstirbet, so sol daz ander, daz vnder in zwain dennoht lebot, vnd die, wer die wa^erint, die dann daz vorgeschriben hûs hofstet vnd garten inne hânt, dannenhin aller ja^erlich ie vff den tag, als sin jârzît dann geuellet, der vorgedâhten priester vnd cappelan, die dann daz selb jârzit zů den vorgeschribenen altârn kylchen vnd cappellan begânt, ieklichem priester besunder von dem selben jârzit fúnf pfenning Costentzer múnse vnd darzů ieklichem der brůder in dem vorgenemten spittal vnd ieklicher der vorgedâhten clôsnerinen ainen pfenning der vorgeschribenen múnse geben vnd rihten. Vnd wenn sú baidú ensint von todes wegen, so sont o^vch dannenhin alle die, wer die wa^erint, die dann daz vorgeschriben hûs hofstett vnd garten inne hant, aller ja^erlich ie vff die tag, als dann ie der vorgenemten sechs personan jârzit geuallent, ieklichem der vorgedahten priester vnd cappelan, die dann iro aller jârzit zů den vorgeschribenen altârn kylchen vnd cappellan begânt, von ieklichem der selben sechs jârzit besunder fúnf pfenning der vorgeschribenen múnse vnd darzů ieklichem der vorgenemten brůder in dem spittal vnd ieklicher der vorgedahten closnerinen ainen Costentzer pfenning geben vnd rihten, vnd sont o^vch dannenhin aller ja^erlich die vorgeschribenen zwên sto^eff vnd o^vch daz naht lieht fúr v´nser fro^vwen altâr geben vnd rihten ân fúrzug vnd ân alle geua^erde, vnd weles jâres sú daz niht ta^etint, so hât ain refater, wele dann vnser refater ist, friges vrlob vnd vollen gewalt, darnach, wenn sú wellent, an vnser herren vnd an der vorgedahten priester vnd cappelan stat daz vorgeschriben hûs hofstat vnd garten ze besetzzenn vnd ze entsetzzenn vnd die selben zins vnd o^vch die zins von den vorgeschribenen hofstetten, die darzů geho^erent, in ze nemenn vnd die zwên sto^effe daz nahtlieht vnd o^vch dú vorgeschribenen jârzît da von ze gebenn vnd ze rihtenn, als vor ist beschaiden, vnd wa^er, daz im da von dehaines jares iht v´ber wûrd, daz sol er mit den vorgeschribenen herren vnd cappelan gelich tailen vnd durch der vorgenemten selen haben. Bescha^ech o^vch, daz der vorgeschribenen priester vnd cappelan dehainer, die dú vorgeschribenen jârzit begân sont, der selben jârzit dehaines niht begiengint ald ob ze den vorgeschribenen altârn kylchen ald cappellan dehainer niht priesters oder cappelan wa^er, die dú vorgeschribenen jârzit begiengint, so sol man ie die pfenning, die dem selben priester dann werden soltent, an dú lieht oder an den bûwe dez selben altars kylchen oder cappelle geben, als dik daz bescha^ech. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent vnd nôtdurftig wârent vnd als reht sitte vnd gewonlich was. Vnd ze wârem offenem vrkúnde vnd sta^eter sicherhait aller diser vorgeschribenen dinge haben wir abt Herman da vorgenemt v´nser insigel gehenkt an disen brief. Darnach veriehent wir die vorgenemten Walther von Englaberg, Adelhait sin elichi wirtinne vnd Johans Sa^erri ir vogt in der vorgeschribenen sache offenlich mit disem brieue ainer gantzzer wârhait aller der dinge, so der êrwirdig v´nser gna^ediger herre von gottes gnâden abt Herman da vorgenemt von v´ns da vor an disem brief veriehen hât. Vnd ze mêrer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen, an dem na^ehsten fritag vor sant Mychels tag in dem jâr, do man zalt von Cristes gebúrt drúzehenhundert jâr, fúnfzig jâr vnd darnâch in dem núnden jâre.

Source Fulltext: Chartularium Sangallense VII, Nr. 4640, S. 468-471.