Allen den, die disen brief ansehent, lesent oder ho^erent lesen, kúnd ich Johans von Sultzberg¹ vnd vergich des offenlich an disem brief, daz ich mit Bilgrin dem Spiser burgermaister ze sant Gallen² vnd || mit allen den, die im hulffent mich vahen, vnd darzů mit dem amman, mit dem rât vnd mit allen den burgern ze sant Gallen von der selben vanknust wegen vnd vmb all die sachan, die ich biz her vntz vff disen || húttigen tag, als dirre brief geben ist, zů in allen ald zů dehainem sunderlich ie ze sprechenn hatt, gantzlich bericht bin, also daz ich gesworn han willeklich ainen gelerten ait ze den hailgon mit v^f gehabnen vin||gern, des vorgenemten Bilgris des Spisers vnd aller der, die im húlffent mich vahen, vnd des ammans, des râtes vnd der burger gemainlich vnd ielichs sunderlich ze sant Gallen vmb die selben vanknust vnd vmb all sachan, als vorgeschriben stat, luter vnd gůt frúnd ze sinne vnd all min frúnd, die in landes sint, inen allen darumb in den na^ehsten vier wuchan nach dem tag, als dirre brief geben ist, ze frúnd gewinnen. Wa^er aber, daz dehainer miner frúnd, die in landes sint, von miner bett vnd von mines werbens wegen niht frúnd werden wo^elt, so han ich gesworn ze den hailgon mit gelerten worten, das ich mich in den na^ehsten aht tagen darnach, so ich des von dehainem minem frúnd, der in land ist, in disen na^ehsten vier wuchan innen wird, vngemant gen sant Gallen in die stat antwurten sol vnd niemer vss der selben stat komen, ê daz die frúnd werdent, von der wegen ich denn mich geantwurt han, ez wa^er dann, daz mir der rât ze sant Gallen ald der mêrtail vnder in tag ga^ebint ald erlobtint v^s ze varenn. Wele aber miner frúnd v^ssrent landes sint, die sol ich inrent den na^ehsten vierzehen tagen, so sú ze land koment, ze frúnd gewinnenn bi dem selben ait. Wele aber der selben miner frúnd das niht tůn wo^eltint, so han ich gesworn ze den hailgon, daz ich mich darnach inrent den na^ehsten aht tagen, so ich das inrent den selben vierzehen tagen innen wird, mich vngemant antwúrten sol gen sant Gallen in die stat vnd niemer darûs komen, êe daz die frúnd werdent, von der wegen ich mich geantwurt han, won mit dez râtes ald des meren tailes vnder in vrlob. Aber vmb min brůder baid³ so han ich gesworn ze den hailgon, daz ich Walthern von Altstetten, den man nemmet Búschinakker⁴, inrent den na^ehsten vierzehen tagen nach disem tag, als dirre brief geben ist, dem vorgeschriben Bilgrin vnd allen den, die im húlffent mich vâhen, vnd dem amman, dem rât vnd den burgern allen ze sant Gallen vmb all sachan, als vorgeschriben stat, ze frúnd gewinnen sol. Wa^er aber, das ich das niht getůn mo^eht, so han ich vnd herr Johans von Haydelberg⁵ ritter gesworn ze den hailgon, das wir v´ns inrent den na^ehsten aht tagen, nach dem vnd ich des in disen na^ehsten vierzehen tagen innen wird, vngemant gen sant Gallen in die stat antwúrten súllent vnd niemer vss der selben stat ze komen won mit des râtes ald mit des mêren tailes vnder in vrlob, êe das der êgenemt Walther frúnd wirt, als vorgeschribenn stat. In den selben ait han ich genomen vnd gesworn, wenn min brůder Herman⁶ ze land kunt, das ich denn den selben minen brůder inrent den na^ehsten aht tagen, so er ze land kunt, ze frúnd gewinnen sol den vorgenemten Bilgrin vnd allen, die im húlffent mich vâhen, vnd dem amman, dem rât vnd den burgern allen ze sant Gallen vmb die vorgedahten vanknust vnd vmb all sachan, als vorgeschribenn stat. Wa^er aber, das ich daz niht tůn mo^eht, so han ich vnd herr Johans von Haydelberg gesworn gelert ait ze den hailgon, das wir v´ns darnach inrent den na^ehsten aht tagen, so ich des in den vorgenemten aht tagen, als er ze land kunt, innen wird, vngemant antwúrten sond gen sant Gallen in die stat vnd niemer darûs ze komenn won mit des râtes ald des meren tail vnder in vrlob, êe daz der egenemt Herman min brůder frúnd wirt, als vorgeschriben stat. Ich han o^vch in den selben ait genomen, wa^er daz ich vssrent landes zů im ka^emi ald botschaft zů im ta^eti, das ich das best, so ich kan, werben sol, das er frúnd werd, als vorgeschriben stat. Wenn o^vch der êgenemt min brůder Herman sinen offenn brief mit sinem insigel besigelt sendet in den rât ze sant Gallen, das er frúnd si worden, als ich in ze frúnd gewinnen sol, so bin ich vnd o^vch der vorgenemt herr Johans vnd der, den ich an des selben herr Johansen stat geben hett, ob der selb herr Johans abgangen wa^er, von des selben Hermans mines brůder wegen ledig, das selb ist o^vch vmb minen brůder Walthern von Altstetten, so der sinen offenn brief besigelt mit sinem insigel sendet in den rât ze sant Gallen, das er frúnd sie worden, als ich in ze frúnd gewinnen sol, als vorgeschriben stat. Ich han o^vch gesworn, wa^er daz der vorgenemt herr Johans stúrbi ald von dem land fu^eri, êe das die vorgeschribenn sachan v^sgericht wúrdint, darumb er sich antwurten sol, das ich denn inrent den na^ehsten vierzehen tagen, wenn ich von dem rât ald von den besorgern ze sant Gallen, ob nút râtes wa^er, mit ir briefen ald mit ir botten ald von irem dehainem ermant wird ze hûs ze hof ald vnder o^vgen, dem rât vnd den burgern ze sant Gallen ainen andern êrbern man miner frúnd, der als gůt vnd als gewiss sie als der vorgenemt herr Johans, an des selben herr Johansen stat geben sol, der sich bind vnd swerr ze tu^enne, als o^vch der vorgenemt her Johans gesworn hat, als vorgeschribenn stat. In der vorgedahten richtung han ich o^vch vss verlassen Hugen Schorant vnd den Lôser vmb die sach, darumb sú geuangen wurdent, als an der vorgedahten richtung geoffnot wart. Darzů ist o^vch mit namen dem êgenemten herr Johansen vnd dem, den ich an sin stat gib, ob er abgieng, als vorgeschribenn stat, behalten, wenn ich von todes wegen abgieng, daz denn der selb herr Johans vnd der, den ich an sin stat geben hett, gantzlich ledig sin sont vmb den vorgeschribenn ayd, so sú vmb daz antwurten getân hant, als vorgeschriben stat. Vnd ze ainer gantzer sicherhait aller der vorgeschribenn dinge vnd gedinge so han ich der vorgenemt Johans von Sultzberg min insigel gehenkt an disen brief. Ich der vorgenemt Johans von Haydelberg ritter vergich offenlich an disem brief, das ich gesworn han mit gelerten worten ze den hailgon, als an disem brief von mir geschriben stat. Vnd dez ze merer sicherhait so han ich o^vch min insigel gehenkt an disen brief. Der geben wart ze sant Gallen an sant Agnes tag in dem iar, do man zalt von gottes gebúrt drúzehenhundert jar, fúnfzig jar vnd darnach in dem núnden jare.

Source Fulltext: Chartularium Sangallense VII, Nr. 4576, S. 420-422.