Allen den, die disen brief sehent lesent oder ho^erent lesen, kúnd ich Eglolf von Rosenberg¹ ritter vnd vergich des offenlich an disem || brief fúr mich vnd fúr alle min erben, das ich mit bedâhtem můt wolerkent vnd angesehen han die gu^etlichi vnd nútzlich || fúrdrung, so mir vnd minen vordern von dem gotzhus ze sant Gallen dik beschehen ist. Vnd das ich darumbe dem selben || gotzhus durch miner sêl hail willen sunder trúw tu^e vnd erzaig, so han ich mit gůter vorbetrahtung willeklich vnd frilich luterlich durch miner sêl hail willen dem êrwirdigen minem gena^edigen herren von gottes gnaden abt Herman abt des gotzhus ze sant Gallen² an des selben gotzhus stat vnd ze sinen handen Johansen von Magelsperg³ Růdolfs selgen von Magelsperg elichen sun, der min lehen was von dem egenemten minem hêrren vnd dem gotzhus ze sant Gallen, mit lip vnd mit gůt vnd mit allen rehten, so ich ald min erben ie an im ald an sinem gůt gehatten von aigenschaft ald von lehenschaft ald von dehainer ander sach wegen, gantzlich vnd gar v^f geben vnd gib mit disem brief, in dem rechten, das der selb egenemt Johans an das vorgenemt gotzhus mit lîp vnd mit gůt vnd mit allen rehten hinnenhin iemer mê geho^eren vnd des recht aigen sin sol. Aber mit namen so behalt ich mir selben vnd minen erben die lehenschaft vnd der lehenschaft reht der gu^eter, so der egenemt Johans von mir ze lehen hât. Ich han o^vch dem egenemten minem herren gelopt mit miner trúw, daz ich vnd min erben, ob ich enwa^er, sin vnd siner nachkomen vnd des vorgenemten gotzhus vmb den obgenemten Johansen von Magelsperg, als ich in v^f geben han, als vorgeschriben stât, recht wern súllent sin nach recht gen menlichem an gaistlichem vnd an weltlichem gericht vnd wâ es dem vorgenemten minem herren vnd sinen nachkomen vnd dem gotzhus ze sant Gallen notdurftig ist. Vnd ist dis alles beschehen vnd redlich vnd reht vollefu^ert mit allen den worten vnd werken, so darzů gehorten vnd notdurftig warent von reht ald von gewonhait. Vnd das dis alles êweklich sicher vnd sta^et vnd vnwandelber belib vnd sie, so han ich der vorgenemt Eglolf von Rosenberg ritter min insigel gehenkt an disen brief fúr mich vnd fúr all min erben. Dirre brief wart geben ze sant Gallen in der stat, an dem na^ehsten samstag vor sant Margarethun tag, in dem jar, do man zalt von Cristus gebúrt drúzehenhundert jar, fúnfzig jar vnd darnach in dem nunden jar.

Source Fulltext: Chartularium Sangallense VII, Nr. 4614, S. 453.