Hainricus dei et apostolice sedis gracia episcopus Constanciensis¹ universis tam presentibus quam futuris, ad quos presentes littere pervenerint, salutem et in domino caritatem. || Significarunt nobis honor(abiles) et religiosi in Christo domini Hermannus abbas² totusque conventus monasterii sancti Galli ordinis sancti Benedicti nostre Constanciensis || dyocesis, quod invalescente hominum malicia iidem abbas et conventus eorumque predecessores, a multis retroactis temporibus citra vacantibus beneficiis ad eorum collacionem || presentacionem vel aliam quamcumque disposicionem spectantibus, iidem abbas et conventus sive capitulum omni tempore potencia temporali eadem beneficia de patronatu ipsorum existencia interdum infantibus interdum eciam laycis et personis aliis inhabilibus et indignis conferre vel ad ea presentare per rerum temporalium ipsius monasterii subtractionem et ablacionem et eciam alias indebite conpulsi fuerunt et adhuc conpelluntur. Item quod propter tyrannidem et invasionem quondam Ludwici de Bawaria³, ecclesie Romane et specialiter ecclesiarum istarum parcium hostis antiqui, ad tantam inopiam devenerunt, quod hospitalitatem tenere et elemosinas facere, secundum quod in dicto ipsorum monasterio fuit hactenus consuetum, et alia ipsius incumbencia onera supportare non valent, et quod ipsi abbas et conventus secundum statum et decenciam ipsius monasterii comode de proventibus ipsius monasterii sustentari non possunt. Item quod dictum ipsorum monasterium circa quadraginta annorum spacium per ignis voraginem funditus fuit destructum, propter quod circa structuram reformacionem et restauracionem ipsius non parvas hactenus fecerunt expensas et adhuc quasi cottidie faciunt. Item quod ad ipsum monasterium victualia et alia necessaria non sine gravibus laboribus et expensis propter situm loci ipsius monasterii scilicet altitudinem moncium sterilitatem et frigiditatem excessivam ac eciam viarum discrimina non aliter quam in dorsis animalium undique bene deferri possunt. Item quod ex epidimia seu hominum mortalitate, que domino permittente in partibus istis hactenus viguit, multitudo colonorum et aliorum hominum ipsius monasterii utriusque sexus ipsis et dicto suo monasterio iure servitutis pertinencium de hac luce ad dominum migravit, adeo quod de pluribus ipsius monasterii possessionibus propter huiusmodi mortalitatem remanentibus incultis census debitos habere ex eis non valerent. Quare nobis humiliter supplicarunt, ut propter premissa dampna et pericula vitanda et ad indigenciam ipsorum relevandam ac eciam pro salute animarum et conservacionem Status ipsius monasterii et monastice discipline et ne cultus divinus, qui in ipso monasterio celebriter agitur, propter temporalium rerum defectum minuatur vel in aliquo depereat, quatenus sibi et ipsorum monasterio et communi mense ipsorum parrochialem eeclesiam in Marpach⁴ cum filia sua ecclesia in Altstetten⁵ dicte nostre dyocesis de patronatu ipsorum existentem, cuius redditus et proventus annui triginta marcarum argenti summam secundum taxacionem decime non excedunt, perpettuo applicare incorporare unire et annectere cum consensu nostri capituli dignaremur. Nos vero inquisita dicti negocii veritate una cum capitulo nostro Constanciensi prehabitis eciam tractatibus insimul quampluribus sollempnibus et diligentibus super eo, quia invenimus, quod necessarium esset ipsi monasterio taliter subveniri, desiderantes eciam necessitatibus dictorum abbatis et conventus et ipsius monasterii subvenire et preamandum in ecclesia dei cultum divinum cum devocione exerceri, ne ex defectu temporalium ad presens vel inposterum ipsorum deo et nobis placens devocio a profectu spiritualium, quod absit, deficere conpellatur. Igitur ex causis premissis, quas invenimus esse veras, et aliis racionabilibus et necessariis nos ad hoc inducentibus eeclesiam parrochialem in Marpach predictam cum filia sua ecclesia in Altstetten prefata cum omni iure iuribus et pertinenciis suis universis et singulis predictis abbati et conventui et per eos successoribus suis et communi ipsorum mense ac eciam ipsi monasterio auctoritate nostra ordinaria et de consensu capituli ecclesie Constanciensis ad laudem dei et sanctorum eius servatis servandis in nomine domini hiis inscriptis in perpettuum applicamus incorporamus annectimus et unimus, reservantes tamen nobis et ecclesie nostre Constantiensi iuribus episcopalibus universis nobis vel archydyacono loci debitis, quodque perpettuo vicarii eiusdem ecclesie per nos et successores nostros, cum vacaverit, instituendi nobis et successoribus nostris legitime presententur, indulgentes eciam eisdem, ut cum dicta ecclesia vacaverit seu ipsam quomodolibet vacare contingerit, quod possessionem eiusdem ecclesie et capelle corporalem iurium et pertinenciarum earumdem propria auctoritate ingredi et apprehendere valeant et in perpettuum habere, et quia, qui altario servit, vivere debet de altari, igitur vicario predicte ecclesie in Marpach et capellano filie sue ecclesie in Altstetten pro sustentacione ipsorum taxamus et deputamus pro prebenda redditus, quos vicarius et capellanus ecclesie et filie predictarum ab antiquo habere consueverunt, cum ex huiusmodi redditibus congrue valeant sustentari, iura episcopalia persolvere et alia sibi incumbencia onera supportare. Et in premissorum testimonium et evidentiam pleniorem nos Hainr. episcopus Constantiensis predictus sigillum nostrum episcopale, nos vero Felix prepositus⁶, V^olr. Decanus⁷ totumque capitulum ecclesie Const(antiensis) predicte recognoscimus et fatemur premissa omnia fore vera et quod predicte ecclesie in Marpach et eius filie in Altstetten applicacioni incorporacioni annexioni et unioni ac omnibus aliis supradictis consensum nostrum liberum et expressum adhibuimus et adhibemus per presentes sigillum nostri capituli una cum appensione sigilli reverendi in Christo patris et domini nostri domini Heinr. episcopi Constantiensis predicti presentibus appendentes in evidens testimonium omnium premissorum. Datum Constancie, anno domini millesimo trecentesimo quinquagesimo nono, XIIII^o. kalend. mensis iulii, indicione duodecima.

Source Fulltext: Chartularium Sangallense VII, Nr. 4606, S. 445-447.