Allen den, die disen gegenwúrtigen brief ansehent lesent oder ho^erent lesen, kúnd ich Walther der Blarrer statamman ze || sant Gallen¹ vnd vergich offenlich mit disem brieue, daz fúr mich kam in der stat ze sant Gallen, do ich offenlich ze geriht || saz, der edel frige herre junkher Etzzel von Enne², vnd offenot da mit fúrsprechen offenlich vor mir an gemainem ge||riht vnd sprach, er wo^elt sich willeklich vnd gern gantzlich vnd gar entzihen fúr sich vnd alle sin erben gen dem fromen vesten ritter hern Herman von der Braiten Landenberg³ vnd gen allen sinen erben vnd nâchkomen aller der reht vordrung vnd ansprach gaistlichs vnd weltlichs gerihtes, so er von reht ald von gewonhait von aigenschaft ald von lêhenschaft ald von dehainen andern sachen hett ald hienâch iemer gewinnen mo^eht zů der burg ze Gúttingen⁴, die man nemmet Mosburg⁵, vnd zů allen den lúten gu^etern vogtyen vnd rehtungen, die von reht ald von gewonhait darzů vnd darin geho^erent vnd die er vnd sin vettern verko^vft hettint vnd ze ko^vffenn geben hettint dem vorgenemten hern Herman von der Braiten Landenberg, als die brief⁶ wol bewisent, die er darumb von in hât, vnd bat mich eruarn an ainer vrtail, wie er daz tůn so^elt vnd mo^eht, daz ez kraft hett vnd nv^ vnd o^vch hie nâch sta^et vnd vnwandelber belib. Do fragt ich vorbenemter amman vrtail vmb, vnd ward ertailt mit gemainer vrtail, daz er ainen vogt nemen so^elt, wen er wo^elt, vnd daz danne mit siner vnd mit dez selben sines vogtes handen tůn so^elt. Do nam er ze vogt Diethelm den Blârrer minen brůder, vnd entzêch sich da der vorgenemt junkher Etzzel von Enne offenlich vor mir an gemainem geriht willeklich frilich vnd vnbezwungenlich gantzlich vnd gar mit siner vnd mit dez vorgenemten Diethelms sines erkornen vogtes handen an dez gerihtes stab in dez vorgenemten hern Hermans hant von der Braiten Landenberg, als reht was vnd als o^vch mit gemainer vrtail ertailt was, aller aigenschaft aller lehenschaft alles rehten aller vordrung vnd aller ansprâch gaistlichs vnd weltlichs gerihtes, so er vnd sin erben, ob er enwa^er, an der vorgeschribenen burg ze Gúttingen vnd an allen den lúten gu^etern vogtyen vnd rehtungen, so von reht ald von gewonhait darzů vnd darin geho^erent, die sú im hant ze ko^vffenn geben, hattent ald hie nâch iemer gewinnen mo^ehtint. Der vorgenemt junkher Etzzel von Enne swůr o^vch offenlich vor mir an offemm gerihte mit dez vorgenemten sines vogtes willen vnd gunst willeklich vnd vnbezwungenlich ainen gelerten ait ze den hailgen mit v^fgehabnen vingern, daz er noch nieman andre an siner stat noch von sinen wegen den vorgenemten hern Herman von der Braiten Landenberg noch kain sin erben noch nâchkomen von der vorgeschribenen burg noch von dehainer lút gu^eter vogtyen noch rehtung, so darzů vnd darin geho^erent, als vorgeschriben stat, noch von dez selben ko^vffes wegen niemer an gesprechen sont mit gaistlichem noch mit weltlichem geriht ân alle geua^erde. Vnd ze ainem wâren vrkúnde vnd ze ainer sta^eten sicherhait aller der vorgeschribenen dinge vnd vergiht so hân ich Walther der Blârrer statamman ze sant Gallen da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Darnâch veriehent wir die vorgenemten Etzzel von Enne ain friger herre vnd Diethelm der Blârrer sin vogt in der vorgeschribenen sache ainer gantzer wârhait aller der dinge, so von v´ns an disem brief da vorgeschriben stânt. Vnd ze mêrer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen in der stat in dem jâr, do man zalt von gottes gebúrt drúzehenhundert jâr, fúnfzig jâr vnd darnâch in dem núnden jâre, an dem na^ehsten samstag vor sant Johans tag dez To^vffers ze súngihten.

Source Fulltext: Chartularium Sangallense VII, Nr. 4609, S. 450-451.