Wir Herman von gottes gnâden abt vnd daz cappittel gemainlich dez gotzhus ze sant Gallen kúnden vnd veriehen offenlich mit || disem brieue allen, die in ansehent lesent oder ho^erent lesen, won v´nser lieber getrúwer Walther von Englaberg vnd Adelhait sin || elichi wirtinne durch iro vnd durch iro vordern sêlen nutz vnd durch v´nsers vorgenemten gotzhus gůter fúrdrung willen mit gůter vorbe||trahtung vnd beschaidenhait den hof ze Albreswîlle gelegen vnderthalb Geriswîlle, der von v´ns vnd v´nserm gotzhus iro lêhen was, mit allen rehten vnd mit aller zů geho^erde, ân allain den zehenden von dem selben hof, willeklich vnd frilich in v´nser hant v^f geben hant¹ an den buwe sant Gallen vnd sant Ôthmars dez múnsters v´nsers vorgenemten gotzhus ze sant Gallen, die selben nutzlich dienst vnd trúwe haben wir erkent gen den êgenemten Walthern von Englaberg vnd Adelhaiten siner elichen wirtinnen vnd haben in darumb ainhelleklich mit gůter vorbetrahtung vnd beschaidenhait baiden gemainlich vnd vnuerschaidenlich reht vnd redlich geben vnd geben in mit disem gegenwúrtigen brieue ze ainem rehten lîpding den vorgeschribenen hof ze Albreswille mit allen rehten vnd mit aller zů geho^erde mit so^elicher beschaidenhait vnd gedinge, daz die êgenemten Walther von Englaberg vnd Adelhait sin elichi wirtinne den vorgeschribenen hof ze Albreswîlle mit allen rehten vnd mit aller zů geho^erde haben niessen besetzzen vnd entsetzzen sont, alle die wîl sú lebent, vnd sont da von ainem bûmaister, wele dann ie dez selben v´nsers múnsters bûmaister ist, aller ja^erlich ie ze sant Gallen tag zwai hu^enr ze rehtem ja^erlichem zins geben vnd rihten ân allen fúrzug vnd ân alle geua^erde, vnd wenn ir aines ab stirbet, so sol daz ander, daz vnder in zwain dennoht lebot, den selben hof ze Albreswîlle haben niessen besetzzen vnd entsetzzen, alle die wîl ez lebot, als ob sú baidú lebtint, vnd wenn sú baidú absterbent, so ist dann der vorgeschriben hof ze Albreswille mit allen rehten vnd mit aller zů geho^erde, ân allain den zehenden von dem selben hof, dem vorgeschribenen v´nserm múnster ze sant Gallen an den bûwe sant Gallen vnd sant Othmars gantzlich vnd gar ledig vnd lôs, also daz dannenhin ain ieklicher bûmaister, wele dann ie dez selben v´nsers múnsters bûmaister ist, den selben hof ze Albreswîlle mit allen rehten vnd mit aller zů geho^erde, ân allain den zehenden, haben niessen besetzzen vnd entsetzzen sont vnd die nútzze von dem selben hof legen sont an den búwe dez vorgeschribenen v´nsers múnsters ze sant Gallen. Wir habent o^vch gelobt mit gůten trúwen, der vorgenemten Walthers von Englaberg vnd Adelhaiten siner elichen wirtinnen vmb daz vorgeschriben lipding wern ze sinne nâch reht gen ma^enlichem an gaistlichem vnd an weltlichem geriht vnd an allen stetten, wâ vnd wenn ald gen wem sú sin nôtdurftig sint. Vnd dez ze ainer wârhait henken wir abt Herman da vorgenemt v´nser vnd v´nsers cappittels insigel an disen brief. Der geben ist ze sant Gallen, an dem na^ehsten fritag nâch sant Mychels tag in dem jâr, do man zalt von Cristus gebúrt drúzehenhundert jâr, fúnfzig jar vnd darnâch in dem núnden jâre.

Source Fulltext: Chartularium Sangallense VII, Nr. 4643, S. 471-472.