Allen den, die disen brief ansehent lesent oder ho^erent lesen, kúnden wir die nâchgenemten Cůnrat Kûmer, Johans Kûmer Elsbethen dez || vorgenemten Cůnratz swester elicher sun vnd V^olrich Túrst V^olrichs sa^elgen dez Túrsten sun von Altstetten¹ vnd veriehent offenlich || mit disem brieue fúr v´ns vnd fúr alle v´nser erben von der zwai vnd zwainzig pfunt pfenning gůter Costentzer múnse wegen, die || der vorgenemt V^olrich Túrst sa^elig in geantwúrt vnd enpfolhen hatt dem erbern priester hern Eberhart Linggenwiller cappelan vnd lútpriester der siechen dez spittals ze sant Gallen², daz v´ns der selb her Eberhart die vorgeschribenen zwai vnd zwainzig pfunt pfenning gantzlich vnd gar widergeben vnd gewert hat, daz er noch sin erben, ob er enwa^er, noch der vorgenemt spittal ze sant Gallen noch nieman andre an siner stat noch von sinen wegen v´ns noch v´nsern erben, ob wir enwa^erint, da von noch da bi niht mêr schuldig sint noch gelten sont noch wider geben. Vnd darumb so lassent wir vnd sagent den vorgenemten hern Eberharten vnd alle sin erben vnd den vorgenemten spittal ze sant Gallen fúr v´ns vnd fúr alle v´nser erben vmb dú selben zwai vnd zwainzig pfunt pfenning gůter Costentzer múnse vnd vmb alle die sachen vnd ansprachen, die wir ald der vorgenemt V^olrich Túrst sa^elig zů dem egenemten hern Eberharten ald zů dem selben spittâl ze sant Gallen vntz her vff disen húttigen tag, als dirre brief geben ist, von dehainer schlaht sachen oder ansprachen wegen hattent ald haben mohtent, gantzlich vnd gar ledig vnd lôs mit disem brieue. Vnd habent o^vch hierúber willeklich gesworn iekliche besunder ainen gelerten ait ze den hailigen mit v^f gehabner hant, daz wir noch v´nser erben, ob wir enwa^erint, noch nieman andre an v´nser stat noch von v´nsern wegen den vorgenemten hern Eberhart Linggenwiller noch sin erben, ob er enwa^er, noch den vorgenemten spittal ze sant Gallen noch nieman andre an siner stat noch von sinen wegen darumb niemer an gesprechen bekrenken bekúmberren noch schadgen súllent mit worten noch mit werken an gaistlichem noch an weltlichem geriht noch mit dehainen andern sachen ân alle geua^erde. Wir habent o^vch in den selben ait genomen vnd gesworn, bescha^ech, daz got niht welle, daz der vorgenemt her Eberhart oder sin erben, ob er enwa^er, ald der vorgenemt spittal ze sant Gallen ald ieman andre an dez selben spittals stat ald von sinen wegen von v´ns ald von ieman andre an v´nser ald an dez vorgenemten V^olrichs dez Túrsten sa^elgen stat vmb dú vorgeschribenen zwai vnd zwainzig pfunt pfenning ald von dehainer ander sto^esse oder ansprâchen wegen, die wir ald der êgenemt V^olrich Túrst sa^elig mit in ald zů in gehept hettint vntz vff disen húttigen tag, als dirre brief ist geben, hinnenhin iemer vf getriben ald an gesprochen wurdint mit dem rehten, daz wir sú dann ân allen fúrzug vnd ân allen iren schaden darumb verstan vnd versprechen súllent nâch dem rehten an gaistlichem vnd an weltlichem geriht vnd an allen stetten, wâ vnd wenn ald wie dik sú dez bedurffent vnd notdurftig sint. Vnd ze ainem waren vrkúnde vnd gantzer sicherhait aller der vorgeschribenen dinge vnd vergiht so haben wir gebetten die ersamen vnd wolbeschaiden den . . burgermaister, den . . amman vnd den . . rât ze sant Gallen, daz sú der stat ze sant Gallen insigel fúr v´ns vnd fúr alle v´nser erben gehenkt hant an disen brief, won wir aigener insigel niht habent. Wir der . . burgermaister, der . . amman vnd der . . rât ze sant Gallen da vorgenemt veriehent offenlich mit disem brieue, daz wir durch ernstlich bet der vorgenemten Cůnrat Kûmers, Johansen Kûmers siner swester sun vnd V^olrichs dez Túrsten, won sú aigener insigel niht hant, v´nser stat ze sant Gallen insigel gehenkt haben an disen brieue. Der geben ist ze sant Gallen in der stat an sant Benedictes tag in dem jar, do man zalt von gottes gebúrt drúzehenhundert jâr vnd darnach in dem sehzigosten jare.

Source Fulltext: Chartularium Sangallense VII, Nr. 4671, S. 491-492.