Wir Herman von gottes gnâden abt des gotzhûs ze sant Gallen¹ tu^en kunt vnd veriehin offenlich an disen^a) brieue allen, die in ansehent lesent oder ho^erent lesen, das fúr v´ns kament die || erberen lúte Burkart Kaltysen vnd Clara sin elichú wirtinn, vnd offnottent da mit fúrsprechen vnd sprachent, das sú des hofs gelegen ze Vorderwile² ainen drit tail mit hûs || mit hof mit akker mit wisen mit wasen mit zwi mit holtz mit veld mit weg mit steg mit wasser mit wasserflússen vnd gengen mit allen vnd vollen rehten, so von reht || ald von gewonhait dar zů vnd darin geho^erent, der von v´ns vnd v´nserm gotzhûs ir lehen was, reht vnd redlich verko^vft hettin vnd zeko^vfent geben hêttin Jacob Růpreht dem eltern burger ze sant Gallen vnd Elsbetun Vo^elinun siner elichun wirtinnun vnd iren erben, ob si enwa^erint, vmb sechs vnd zwainzig phunt phennig gůter vnd gena^emer Costentzer múnse, der si ga^entzlich vnd gar von inen gewert werint vnd an iren gůten nutz bekert hettint, vnd baten vns ervarn an ainer vrtailt, wie sú sich des vorgenanten hofs zeVorderwile entzihen vnd an ir hant bringen so^eltin, als es nû vnd o^vch hie nach kraft hêtti. Do fragten wir vrtail^b) vmb, vnd ward ertailt mit gesamnoter vrtail, das der vorgenemt Burkart Kaltysen den vorgeschriben hof ze Vorderwile mit allen rehten an vnser hant vf ga^ebi vnd das die vorgenemt Clara sin elichú wirtenn mit des vorgenemten Burkart Kaltysens ir elichen mannes willen ainen vogt na^emi vnd si der dristunt v^s fůrti vnd si fragti, ob si den vorgeschribenn ho^vf ze Vorderwile willeklichen vnd vnbezwngenlichen v^f gen wo^elti, vnd wêr, das si veriech, den vorgeschriben hof ze Vorderwile willeklich vnd vnbezwngenlichen vf zegebent, das o^vch si mit des vogtes hant den vorgeschriben hof ze Vorderwile v^f geben so^eltin. Do nâm si ze vogt Hainrich den Kúchler o^vch burger ze sant Gallen mit ir vorgenemten mannes willen. Do fůrt der vorgenemt Hainrich der Kúchler die vorgenemtun frôn Clarun Burkarts Kaltysens elichun wirtinnun vs dristunt, als ertailt wart, vnd fragte si, ob si den vorgeschriben hof ze Vorderwile wo^elti willenklichen vnd vnbezwngenlichen v^f gen, der veriach, das si den vorgeschriben hof ze Vorderwile willenklich vnd vnbezwngenlich v^f gen wo^elti. Do gab der vorgenant Burkart Kaltysen mit siner hant vnd o^vch die vorgenant frôn Clara sin elichú wirtinn mit ir vnd o^vch mit ir vorgenemten vogtes hant Hainrich des Kúchlers den vorgenemten hof gelêgen ze Vorderwile mit allen rehten nútzen vnd zůgeho^erd vnd gewonhaitten vnd mit allem dem, so von reht ald von gewonhait dar in geho^erent, willenklich ledklich frilich v^f an vnser hant vnd baten v´ns der^a) vorgeschriben hof ze Vorderwile lihen den vorgenemten Jacob Růpreht vnd Elsbetun Vo^elinun siner elichun wirtinnun, den wir o^vch den vorgeschriben hof ze Vorderwile mit allen vnd vollen rehten durch ir bet gelihen habint vnd lihint mit disem brieue, vnd entzihent sich o^vch da die vorgenemten Burkart Kaltysen vnd frôn Clara sin elichú wirtinn fúr sich selber vnd fúr alle ir erben offenlich vor geriht aller aigenschaft aller lehenschaft aller rehten aller vordrung vnd aller ansprach, so sú vnd ir erben an disen vorgeschriben hof ze Vorderwile von reht ald von gewonhait hettent ald iemer gewinnen mugent. Vnd hant o^vch die vorgenemten Burkart Kaltysen vnd frôn Clara sin elichú wirtinn gelo^vbt mit gůten trúwen, den vorgenemten Jacob Růprehten vnd Elsbetun Vo^elinun siner elichún wirtinnun vnd iren^c) erben, ob si enwa^erint, des vorgenemten hofs ze Vorderwile wer zesint nach reht ge^g) ma^englichen v^f gaistlichem vnd weltlichem geriht. Vnd ist dis alles vollfu^ert vnd beschehen mit allen den worten vnd werchen, so von reht ald von gewonhaitten dar zů geho^erent vnd nottúrftig sint, vnd ze vrkúnt der warhait aller der vorgeschribener dinge so henken wir der obgenant abt Herman des vorgeschriben gotzhûs ze sant Gallen vnsern insigel an disen brieue. Wir die vorgenemten Burkart Kaltysen vnd frôn Clara sin elichú wirtin vnd o^vch Hainrich Kúchler ir vogt in der vorgeschribener sach veriehent ain gantz warhait aller der vorgeschribener dinge vnd gedinge, so v´nser gena^ediger herr da vorgenemt abt Herman des vorgeschriben gotzhus ze sant Gallen von vns veriehen hât an disem brieue, vnd ze merer sicherhait der selben dinge henken wir o^vch v´nsrú insigel an disen brieue. Der geben ist ze sant Gallen in der stât, do man zalt von gottes gebúrt drúzehenhundert jâr vnd darnach in dem sechzigosten jâr, an der na^echstun mitwochen in der o^vsterwochen.

Source Fulltext: Chartularium Sangallense VII, Nr. 4673, S. 493-494.