Reverendissime pater et amice karissime¹. Cum nuper vacante abbacia monasterii sancti Galli Constanciensis diocesis ordinis sancti Benedicti per obitum Hermanni² ultimi abbatis ibidem religiosi prior et conventus eiusdem monasterii capitulariter congregati more solito per viam scrutinii procedentes servatis singulis cerimoniis de consuetudine ac de iure observandis religiosum fratrem Georium de Wildenstain³ prepositum et conventualem ibidem virum utique ydoneum et sufficientem in spiritualibus providum et temporalibus circumspectum moribus et conversatione, prout fidedignorum relatione percepimus, multipliciter commendandum concorditer et unanimi consensu nullo penitus discrepante in abbatem ipsorum rationabiliter et omni devotionis studio duxerint eligendum, nos considerantes multiplicia probitatis merita eiusdem Georii, sperantes eciam ipsum monasterium sui providencia imperiali nostro presidio accedente feliciter gubernari. Quare paternitatem vestram affectuose petimus et rogamus, quatenus contemplacione nostri et sicut de vobis indubie confidimus apud dominum nostrum summum pontificem velitis promotive efficere, quod electionem de predicto Georio sic concorditer et canonice celebratam dignetur admittere ipsique electo munus benedictionis impendere ac ipsum confirmare necnon alia omnia gratiose facere, que circa predictum negocium quomodolibet fuerint oportuna, singularem nobis in hoc, pater reverendissime, et acceptam nimium complacenciam facientes. Datum in campis ante Schorrendorff⁴, die secunda mensis septembris, regnorum nostrorum anno quintodecimo, imperii vero sexto.||
Karolus quartus divina favente clemencia Romanorum imperator semper augustus et Boemie rex.

Source Fulltext: Chartularium Sangallense VII, Nr. 4698, S. 513-514.