Ich V^olrich von der Hohen Klingen frije lantrichter in Thurgo^vwe tůn kunt, daz fúr mich || kamen ze der Lo^vben an dem lantag an dem ne^ahsten fritag vor sant Johans tag || ze súngichten die erbern lúte Růdolf von Liehtensteig schriber mins herren von || sant Gallen einunt vnd V^olrich vnd Heinrich die Giele von Glatburg andrunt. Vnd offente da der vorgenante Růdolf der schriber, daz im verkúndet were von dem gerichte, daz V^olrich vnd Heinrich die Giele von Glatburg die nutzlichen wer versprochen hetten, die er genomen hette von dem gerichte v´ber den zehenden ze Matzingen, vnd daz im o^vch tag geben were vff disen húttigen lantag, daz ze versprechenne nach rechte. Vnd sprach der egenante Růdolf der schriber, daz der selb zehende sin lehen were von hern Johans dem Giele von Liebenberg. Da sumden in an die vorgenanten V^olrich vnd Heinrich die Giele von Glatburg, vnd batt ob es recht were, daz ich inen gebutte, daz si in dar an vngesumet liezzen. Des antwrten die egenanten V^olrich vnd Heinrich die Giele von Glatburg vnd sprachen, daz ir eni vnd her Johans vnd V^olrichs der Gielen von Liebenberg eni recht gebrůdere weren vnd hettin daz lehen vnd andrú lehen gemein mit ein ander. Vnd weren o^vch vnwissende, daz si daz lehen oder andrú lehen mit ein ander geteillet hettin. Vnd getrúwetin dem rechtem, daz si als wol lihen so^ellen als her Johans der Giele. Vnd giengen do von dem gerichte. Do batt im Růdolf der schriber erfarn, was sins rechten were. Do wart erteillet mit gesamnoter vrteil nach miner frage, sit daz V^olrich vnd Heinrich die Giele von Glatburg bi dem gerichte fúrbas nit klegtin zů dem zehenden, daz denne daz versprechen dem egenanten Růdolf dem schriber enhein schaden bringen so^elti, vnd daz es billich ab sin so^elti, vnd daz man im billich einen schirmer dar v´ber geben so^elte, ob er des můttiti. Do vorderte er ze schirmer Albrecht von Lindenberg¹. Dem gebot ich o^vch vor gerichte vnd gebúte im mit disem brief, daz er den egenanten Růdolf den schriber schirmen sol vff dem egenanten zehenden ze Matzingen, den er ze lehen hat von hern Johs. dem Giel, als vorbescheiden ist, vff recht. Da von Albrecht von Lindenberg so halte dis gebot. Tůst du des nit, ich richte hin zů dir nach rechte. Vnd des ze vrkúnde han ich des lantgerichts insigel in Thurgo^vwe gehenket an disen brief. Der geben wart an dem vorgeschriben lantag nach Kristus gebúrte drúzehenhundert vnd sechtzig iaren.

Source Fulltext: Chartularium Sangallense VII, Nr. 4687, S. 505-506.