Wir Herman von gottes gnâden abt dez gotzhus ze sant Gallen¹ tu^en kunt vnd veriehen offenlich mit disem brieue || allen, die in ansehent lesent oder ho^erent lesen, daz fúr v´ns kament ze sant Gallen, do wir ze geriht sassent, v´nser || lieber getrúwer Walther von Englaberg² vnd Adelhait sin elichi wirtinne vnd offenotent offenlich vor v´ns mit || fúrsprechen vnd sprâchent also von der nâchgenemten zehenden wegen, der zehend vsser dem hof ze Albreswille³ gelegen vndrenthalb Geriswille⁴ vnd die zehenden vsser den nâchgenemten gu^etern vsser dem gůt, daz man nemmet sant Fiden⁵ gůt, vnd vsser dem gůt, daz man nemmet dez Kadels vnd Peters gůt, die von vns vnd vnserm gotzhus iro lehen wa^erint, die sú v´ns durch iro vnd durch iro vordern selen nutz vnd durch vnsers vorgenemten gotzhus gůter fúrdrung willen mit gůter vorbetrahtung vnd beschaidenhait reht vnd redlich ze ko^vffenn geben hettint mit allen rehten vnd mit aller zů geho^erde an den bûwe sant Gallen vnd sant Ôthmars v´nsers múnsters dez vorbenemten gotzhus ze sant Gallen vmb nún pfunt pfenning gůter Costentzer múnse, der sú gantzlich von v´ns gewert wa^erint vnd enpfangen hettint vnd an iren offenn nutz bekêrt, vnd wo^eltint sich o^vch der selben zehenden vnd aller der reht, so sú daran ald darzů hettint, willeklich verzihen vnd ze vnsern handen vertgen an die vorgeschribenen búwe, vnd baten v´ns eruarn an ainer vrtail, wie sú daz tůn so^eltint vnd mo^ehtint, daz ez nv vnd o^vch hie nâch kraft hetti. Daz taten wir, vnd wârd ertailt mit gemainer vrtail, daz der vorgenemt Walther von Englaberg die vorgeschribenen zehenden mit siner hant in vnser hant v^f geben so^elt, vnd daz die vorgenemt Adelhait sin elichi wirtinne ainen vogt nemen so^elt an dem ring, wen si wo^elt, mit dez selben ir elichen wirtes willen, vnd si der ze drin mâlen vsser dez gerihtes ring fu^eren so^elt vnd si fragen, ob si ez willeklich vnd gern ta^et vnd tůn wo^elt, vnd daz si dann die vorgeschribenen zehenden mit ir vnd mit dez selben ir vogtes handen an vnser hant v^f geben so^eltint. Do nam si mit dez selben ir elichen wirtes willen vnd gunst Andres Entzziswiller burger ze sant Gallen ze vogt, der fůrt si ze drin malen vsser dez gerihtes ring vnd fragot si, als ertailt was, ob si ez willeklich vnd gern ta^et vnd tůn wo^elt. Der sait ze ieklichem mâl bi sinem aide, daz si spra^ech, daz si ez vnbezwungenlich ta^et vnd willeklich tůn wo^elt, vnd gabent do die vorgenemten Walther von Englaberg mit siner hant vnd Adelhait sin elichi wirtinne mit ir vnd mit dez êgenemten Andres Entzziswillers ir vogtes handen die vorgeschribenen zehenden ze Albreswille vsser dem hof vnd die zehenden vsser sant Fiden gůt, vsser dem gůt, daz man nemmet dez Kadels vnd Peters gůt, mit allen rehten vnd mit aller zů geho^erde willeklich vnd gern gantzlich vnd gar v^f an vnser hant mit so^elicher beschaidenhait vnd in dem rehten, daz die vorgeschribenen zehenden mit allen rehten vnd mit aller zů geho^erde hinnenhin iemer mêr geho^eren sont an sant Gallen vnd an sant Othmars bûwe dez múnsters v´nsers vorbenemten gotzhus ze sant Gallen, vnd verzigent sich o^vch da die vorgenemten Walther von Englaberg vnd Adelhait sin elichi wirtinne mit dem vorgenemten irem vogt willeklich vnd gern gantzlich vnd gar vnd verzihent sich mit disem brieue fúr sich vnd alle ir erben aller aigenschaft, aller lehenschaft, alles rehten, aller vordrung vnd aller ansprach gaistlichs vnd weltlichs gerihtes, so sú vnd ir erben, ob sú enwa^erint, an den vorgeschribenen zehenden biz her ie gehattent. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent vnd nôtdurftig warent, vnd als reht sitte vnd gewonlich was. Vnd ze wârem offenem vrkúnde vnd sta^eter sicherhait aller diser vorgeschribenen dinge haben wir abt Herman da vorgenemt v´nser insigel gehenkt an disen brief. Darnâch veriehen wir die vorgenemten Walther von Englaberg, Adelhait sin elichi wirtinne vnd Andres Entzziswîller ir vogt in der vorgeschribenen sache offenlich mit disem brieue ainer gantzzer wârhait aller der dinge, so der erwirdig v´nser gna^ediger herre von gottes gnâden abt Herman da vorgenemt von v´ns da vor an disem brief veriehen hât. Vnd ze mêrer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen an dem na^ehsten ma^entag vor sant Johans tag dez To^vffers ze súngihten in dem jâr, do man zalt von gottes gebúrt drúzehenhundert jâr vnd darnach in dem sehszigosten jâre.

Source Fulltext: Chartularium Sangallense VII, Nr. 4688, S. 507-508.