Wir Herman von gottes gnâden abt vnd daz cappittel gemainlich dez gotzhûs ze sant Gallen kúnden vnd || veriehen offenlich mit disem brieue allen, die in ansehent lesent oder ho^erent lesen, won vnser lieber getrúwer || Walther von Englaberg vnd Adelhait sin elichi wirtinne durch iro vnd durch iro vordern selen nutz vnd durch || vnsers vorgenemten gotzhus gůter fúrdrung willen mit gůter vorbetrahtung vnd beschaidenhait den zehenden von dem hof ze Albreswille gelegen vndrenthalb Geriswille vnd die zehenden vsser disen nâchgenemten gu^etern, vsser dem gůt, daz man nemmet sant Fiden gůt, vnd vsser dem gůt, daz man nemmet dez Kadels vnd Peters gůt, die von vns vnd vnserm gotzhus iro lehen wârent, mit allen rehten vnd mit aller zů geho^erde vns reht vnd redlich ze ko^vffenn geben vnd geuertgot hant an den buwe sant Gallen vnd sant Othmars dez múnsters v´nsers vorbenemten gotzhus ze sant Gallen vmb nún pfunt pfenning gůter Costentzer múnse, als der brief¹ wol bewiset, den wir darumb von in habent, die selben nutzlich dienst vnd trúwe haben wir erkennet gen den êgenemten Walther von Englaberg vnd Adelhaiten siner elichen wirtinnen vnd haben in darumb ainhelleklich mit gůter vorbetrahtung vnd beschaidenhait baiden gemainlich vnd vnuerschaidenlich reht vnd redlich geben vnd geben in mit disem gegenwúrtigen brieue ze ainem rehten lipding die vorgeschribenen zehenden, den zehenden vsser dem hof ze Albreswille vnd die zehenden vsser dem gůt, daz man nemmt sant Fiden gůt, vnd vsser dem gůt, daz man nemmet dez Kadels vnd Peters gůt, mit allen rehten vnd mit aller zů geho^erde mit so^elicher beschaidenhait vnd gedinge, daz die êgenemten Walther von Englaberg vnd Adelhait sin elichi wirtinne die vorgeschribenen zehenden vsser dem vorgenemten hof vnd gu^etern mit allen rehten vnd mit aller zů geho^erde haben messen besetzzen vnd entsetzzen sont, alle die wil sú lebent, vnd sont davon ainem bûmaister, wele dann ie dez selben v´nsers múnsters bûmaister ist, aller ja^erlich ie ze sant Gallen tag ain hůn ze rehtem ja^erlichem zins geben vnd rihten ân allen fúrzug vnd ân alle geua^erde. Vnd wenn ir aines ab stirbet, so sol daz ander, daz vnder in zwain dennoht lebot, die vorgeschribenen zehenden haben niessen besetzzen vnd entsetzzen, alle die wîl ez lebot, als ob sú baidú lebtint, vnd wenn sú baidú ab sterbent, so sint dann die vorgeschribenen zehenden mit allen rehten vnd mit aller zů geho^erde dem vorgeschribenen v´nserm múnster ze sant Gallen an den bûwe sant Gallen vnd sant Othmars gantzlich vnd gar ledig vnd lôs, also daz dannenhin ain ieklicher bûmaister, wele dann ie dez selben v´nsers múnsters bûmaister ist, die selben zehenden mit allen rehten vnd mit aller zů geho^erde innemen haben niessen besetzzen vnd entsetzzen sont vnd die selben nútzze der selben zehenden legen sont an den bûwe dez vorgeschribenen v´nsers múnsters ze sant Gallen. Wir habent o^vch gelobt mit gůten trúwen, der vorgenemten Walthers von Englaberg vnd Adelhaiten siner elichen wirtinnen vmb daz vorgeschriben lîpding wern ze sinne nâch reht gen ma^enlichem an gaistlichem vnd an weltlichem geriht vnd an allen stetten, wâ vnd wenn ald gen wem sú sin nôtdurftig sint. Vnd dez ze ainer wârhait henken wir abt Herman da vorgenemt v´nser vnd v´nsers cappittels insigel an disen brief. Der geben ist ze sant Gallen an dem na^ehsten donstag nâch sant Johans tag dez To^vffers ze súngihten in dem jâr, do man zalt von gottes gebúrt drúzehenhundert jâr vnd darnâch in dem sehszigosten jâre.

Source Fulltext: Chartularium Sangallense VII, Nr. 4690, S. 508-509.