Innocencius episcopus servus servorum dei^a) dilecto filio Georgio abbati monasterii sancti Galli¹ Romane ecclesie immediate subiecti ordinis sancti Benedicti Constanciensis diocesis salutem etc. Suscepti cura regiminis cor nostrum continua pulsat instancia, ut solicitudinis debitum, ad quod universis orbis ecclesiis ac monasteriis nos apostolice servitutis necessitas obligat, eorum singulis, prout nobis ex alto conceditur, exolvamus, in eo maxime, ut illorum regimina, que suis sunt destituta pastoribus et Romane ecclesie immediate subiecta, personis talibus committantur, per quarum solerciam et solicitudinem circumspectam ecclesie et monasteria ipsa in spiritualibus et temporalibus valeant adaugeri. Dudum siquidem quondam Hermanno abbate monasterii sancti Galli² dicte Romane ecclesie inmediate subiecti ordinis sancti Benedicti Constanciensis diocesis regimini ipsius monasterii presidente, nos cupientes eidem monasterio, cum vacaret, per apostolice sedis providenciam utilem et ydoneam presidere personam, provisionem monasterii predicti ordinacioni et disposicioni nostre duximus ea vice specialiter reservandam, decernentes extunc irritum et inane, si secus super hiis a quoquam quavis auctoritate scienter vel ignoranter contingeret attemptari. Postmodum vero dicto monasterio per eiusdem Hermanni abbatis obitum, qui extra Romanam curiam diem clausit extremum, vacante, dilecti filii conventus dicti monasterii reservacionem et decretum predicta ut asseritur ignorantes te ipsius monasterii prepositum in sacerdotio constitutum in eorum et dicti monasterii abbatem licet de facto concorditer elegerunt, tuque reservacionis et decreti predictorum ut asseritur eciam inscius electioni huiusmodi illius tibi presentato decreto consensisti et deinde tu dubitans de reservacione et decreto predictis huiusmodi electionis negocium proponi fecisti in consistorio coram nobis. Nos igitur electionem predictam utpote post et contra reservacionem et decretum predicta attemptatam irritam reputavimus et inanem et ad provisionem eiusdem monasterii celerem et felicem, de qua nullus preter nos hac vice disponere potuit neque potest, reservacione et decreto obsistentibus supradictis, ne monasterium ipsum diutine vacacionis subiaceret incommodis paternis et solicitis studiis intendentes, post deliberationem, quam de preficiendo eidem monasterio personam utilem et eciam fructuosam habuimus cum nostris fratribus diligentem, demum ad te, cui de religionis zelo, litterarum sciencia, vite ac morum honestate aliisque multiplicium virtutum meritis apud nos fidedigna perhibentur testimonia, considerata eciam dictorum conventus te eligencium voluntate concordi, direximus oculos nostre mentis, quibus omnibus debita meditacione pensatis de persona tua prefato monasterio de dictorum fratrum consilio auctoritate apostolica providemus teque illi preficimus in abbatem curam et administracionem ipsius tibi in spiritualibus et temporalibus plenarie committendo in illo, qui dat gracias et largitur premia, confidentes, quod monasterium ipsum sub tuo felici regimine gracia tibi assistente divina grata suscipiet incrementa. Quocirca discrecioni tue per apostolica scripta mandamus, quatenus onus regiminis dicti monasterii suscipiens reverenter sic te in eo solicite prudenter et fideliter exercendo exhibeas studiosum, quod monasterium ipsum per laudabile tue diligencie studium gubernatori provido et fructuoso administratori gaudeat se commissum tuque preter eterne retribucionis premium nostram et sedis predicte benedictionem et graciam exinde uberius consequi merearis³. Dat. Auinione XVII. kl. novembr. anno octavo.

Source Fulltext: Chartularium Sangallense VII, Nr. 4707, S. 520-521.