Wir Karl von gotz gnaden Romischer kaiser zů^b) allen zitten merer dez richs vnd kv^enig zů Beheim kvnden vnd veriehen dez offenlichen mit || disem brief, das wir mit wolbedahtem mv^ot den erwirdigen vnsern vnd des richs lieben getrewen fursten bischoff Hainrichen zů Kostentz² vmb || die trîw^oe, so er zů v^ens vnd dem heiligen rich hat, in vnser keiserlich genade hulde vnd schirme genomen haben vnd empfangen, mit der || beschaidenheit, das wir den selben bischof Hainrichen ze Kostentz vnd sin gotzhůs zů Kostentz, die wile wir leben, mit gutten trúwen ane alle geuerde in allen sachen, darzů er vnd sin gotzhůs zů Kostentz reht haben vnd gehaben mu^egent, des rehten helfen su^ellen vnd beholfen sollen sin vnd ouch schirmen gen aller mengelich. Vnd davon so heissen vnd gebieten wir ernstlichen vnd ouch vesteclichen mit disem brief allen vnsern vnd dez heiligen richs vogtin vnd amptlu^eten, die wir ietz ze Swaben hant oder hernach da setzen, vnd ouch allen vnsern vnd dez selben richs stetten zů Swaben vnd sůnderlichen vnd mit namen den von Kostentz, von Zu^erich, von sant Gallen, von Schafhusen³, von Lindowe⁴, von Rauenspůrg⁵, von Vberlingen⁶ vnd von Buchorn⁷, daz si den obgenanten bischof Hainrich vnd sin gotzhůs zů Kostentz in allen iren sachen vf daz reht schirmen vnd ouch halten vnd inen dez rehten gen aller mangelichen von vnsern wegen helfen vnd beholfen sin bi v^ensern vnd dez richs hulden vnd genaden an allez verziehen vnd ane alle widerrede, wanne si darv^omb von den obgenanten bischof Hainr. zů Kostentz ermant werdent. Wir wollen ouch, daz im dez alle vnser vo^egt vnd amptlu^et zů Swaben, als dicke wir si a^enderent vnd verkerent, ir offenn brif geben, wanne vnd als bald er si des anmv^ot vnd an si vordert, das si im vnd sinem gotzhůs zů Kostentz von vnsern wegen dez rehten helfen vnd beholfen sien, wa wir der lande sin. Mit vrku^end dis briefes versigelt mit vnserm keiserlichen insigel. Der geben ist ze Nu^ernberg nach Crist geburt druzehenhůndert jar, darnach in dem ain vnd sehtzigosten jar, an der nehsten mitwochen nach dem svntag, so man singet Jubilate, vnserer riche in dem fu^enfzehenden vnd dez keisertv^oms in dem sibenden jar.

Source Fulltext: Chartularium Sangallense VII, Nr. 4735, S. 543-544.