Allen den, die disen gegenwúrtigen^a) brief an sehent lesent oder ho^erent, kúnden wir her Walther ritter || vnd V^olrich gevetter von der Alten Klingen¹ frye herren vnd veriehen des offenlich an disem brief, || das wir willeklich vnd gern durch got vnd durch bette der erwirdigen frowen der a^ebtissinne || vnd dem conuent gemainlich des gotzhus ze Maggenôw² reht vnd redelich geben haben ze rehtem aygen, die hůbe gelegen ze Flawille³, dú stosset ainhalb an der Iungen gůt vnd andrenthalb an der von Luterberg⁴ gůt, vnd was zů der hůbe ho^eret von reht ald von gewonhait, vnd haben inen die selben hůbe geben vnd gefertegôt fúr reht aigen mit allen den worten werken vnd geta^eten, so dar zů horten ald gehoren mohtôn nach gewonhait vnd nach reht, vnd haben v´ns dar v´ber verzigen vnd verzihen v´ns an disem brief fúr v´ns vnd alle v´nser erben vnd nachkomen gen den vorgenanden gaistlichen frowen vnd gen allen iren erben vnd nachkomen alles des rehten vnd aller der ansprach vorderung kuntschaft besazzung, so wir zů der vorgenanten hůbe ie gehatten ald von dehainen dingen noch gehaben ald gewinnen mo^ehtin wir ald v´nser nachkomen. Es sont och wir vnd v´nser nachkomen der selben hůbe iro vnd ir nachkomen reht wernn sin fúr reht aygen nach reht an geua^erd gem^b) mainglichem, wa sin v´nser vorgenanden frowen von Magnôw bedurfent ald sin notdúrftig sint. Vnd ze warem offenn vrkúnd vnd sta^eter vnd ewiger sicherhait aller dirre ding geben wir die vorbenempten her Walther vnd V^olrich von der Alten Klingen fúr v´ns vnd v´nser erben vnd nachkomen der vorgenanten gaistlichen frowen der a^ebtissinne vnd dem conuent des gotzhus ze Maggnôw vnd iren nachkomen dar v´ber disen brief mit v´nseren aigen insigelnn besigelten. Dis beschach vnd wart dirre brief geben ze Costentz in der stat, do man zalt von Cristus gebúrt drúzehen hundert iar, dar nach in dem ain vnd sehzigosten iar, an dem na^ehsten dunstag nach sant Peters vnd sant Paulus tag.

Source Fulltext: Chartularium Sangallense VII, Nr. 4751, S. 556-557.