Allen, die disen brief ansehent oder ho^erent lesen, kúnden wir Johans von Krenkingen¹ ain friger herr vnd Hainrich von Krenkingen sin svn² korherr ze || dem thv^om ze Costentz vnd vergehin offenlich mit disem brief vmb die vesti Gůtenburg³, dv´ vff der Schlu^eht⁴ gelegen ist vnd von dem hailgen rich || lehen ist, vnd den turn darinn, der lehen ist von dem abt vnd dem gotzhus ze sant Gallen, die ich der selb Johans von Krenkingen mit lút vnd mit || gůt vnd mit allen nútzen gewonhaiten vnd rehten vnd mit aller zůgeho^erd versetzet hab den frummen vesten rittern hern Walthern vnd her Burkarten gebrůdern von Hohenfels⁵ vmb fúnfzehenhvndert mark silbers Costentzer gewa^eges, als die brief bewisent, die darúber geben sint, das wir inen darvmb gemainlich vnd vnuerschaidenlich baide fúr v´ns vnd v´nser erben gelobt habin, die selben vesti Gůtenburg vnd den turn darinne ze fertgend von v´nserm herren dem kayser vnd dem abt von sant Gallen in ains rehten werenden pfandes wis mit brieuen vnd insigeln nach ir nottúrft ane alle geuerde hinnan ze sant Martins tag dem na^ehsten, der nv kvnt. Ta^etin wir des nit, so so^elin wir vnd die búrgen, die hie nach benempt sint, inen darvmb haft vnd gebunden sin ze laistend, als hie nach geschriben stat, vntz inen dv´ fertgvng wirt vssgeriht nach ir nottúrft ane alle geuerde. Vnd habin inen darvmb ze merer sicherhait mit v´ns ze rehten búrgen geben vnd gesetzet graf Hainrichen von Nellenburg⁶, hern Hugen von Griesshain⁷ ritter vnd Hainrichen Amstad burger ze Schafhusen⁸. Die selben búrgen vnd wir die vorgenanten Johans von Krenkingen vnd Hainrich sin svn habin alle offenlich gesworn ieglicher besvnder ainen gelerten aid ze den hailgen, wenne wir vnd die selben búrgen nach dem vorgenanten zil von den selben hern Walthern vnd hern Burkarten gebrůdern von Hohenfels^a) vnd ir erben, ob si enwerin, ald von ir botten darúber gemant werdin ze hus ald ze hof ald vnder ogen, so so^elin wir v´nd^b) die selben búrgen v´ns alle nach der manvng inrvnt den na^ehsten aht tagen mit v´nser selbs liben gen Costentz in die stat ald gen Schafhusen ald gen Dyessenhouen⁹ ald gen Stain¹⁰ in der vier stett ain, in wele wir went, mit v´nser selbs liben in a^entwúrten vnd och da vmb die selben fertgvng reht giselschaft an offnen wirten ane alle geuerde laisten ieglicher besvnder ie zwai male an dem tag, vnd so^elin och wir die vorgenanten Johans von Krenkingen vnd Hainrich von Krenkingen sin svn mit namen danne in der vier^c) stett ainer, wa wir v´ns hin^d) gea^enwúrt^e) habin, mit v´nser selbs liben bi den aiden, so wir gesworn habin, in der giselschaft beliben vnd niemer von dannan komen won mit der selben von Hohenfels gůtem willen ald ir erben, ob si enwerin, e das inen dv´ fertgvng nach ir nottúrft ane alle geua^erd wirt vssgeriht. Doch ist den vorgenanten búrgen allen behalten vnd sol ir ieglichem svnderlich behalten sin, wele mit sin selbs sebe^f) nit laisten wil ald mag, der sol ainen kneht mit ainem pfa^erit gen Costentz gen Schafhusen gen Diessenhouen ald gen Stain in der vier^g) stett ain, in wele er wil, an sin stat in ains offen wirtz hus senden vnd dahin ze gisel legen, der ane geuerde ie zwai male an dem tag laist vnd als túr kome, als ob v´nser ieglicher svnderlich mit sin selbs lib ze gisel la^eg, aber der vorgenant Hainrich Amstad sol die selben giselschaft^h) vnd laistvng tv^on vnd vollefu^eren bi dem aid, so er gesworn hat, vsserthalb Schafhusen ze Costentz ald ze Diessenhouen ald ze Stain in der driger stett ainr, in weler er wil. Gieng inen och der selben búrgen dekainr ab von todes wegen ald von andren dingen, so so^elin wir inen ie ainen andern búrgen als gewissen an des abgangen stat setzen vnd geben darnach inrvnt dem na^ehsten manot, so wir darvmb ermant werdin, ald wir die vorgenanten Johans von Krenkingen vnd Hainrich von Krenkingen sin svn vnd die andern búrgen sont alle laisten, als vorgeschriben stat, vntz wir inen den búrgen, wele inen danne abgangen ist, ie berihtin. Wir die selben Johans von Krenkingen vnd Hainrich sin svn von Krenkingen habin och fúr v´ns vnd v´nser erben die obgenanten búrgen gelobt ze lo^esend ane allen iren schaden, wie si von dirr búrgschaft vnd laistvng wegen ze schaden koment. Vnd ze warem vnd offem vrkúnd aller dirr vorgeschriben ding gebin wir die vorgenanten Johans von Krenkingen vnd Hainrich von Krenkingen sin svn vnd och wir die búrgen v´nsrú insigel an disen brief. Der ist ze Costentz geben, do man von Cristes gebúrt zalt drúzehenhvndert jar, darnach in dem ain vnd sehtzigosten jar, an sant Vitis vnd Modestis abent.

Source Fulltext: Chartularium Sangallense VII, Nr. 4746, S. 552-553.